Ka MLA ka Sutnga-Saipung, ka Santa Mary Shylla ha ka 17 tarik uni u bnai da wai ko ya ka yingkieñ lai kjat kawa da chna hajrong ka wah Amsngad wa em ha chnong Ratacherra, East Jaiñtia Hills District.
Kani ka yingkieñ toh kawa da chna da ka sorkar jylla hapoh ka Inter-State Border Areas Development Programme (ISBADP) 2023-24, wei daw yarap bha ko kattu ya ki bru wa sah ha ki thaaiñ khappood khamtam kiwa sah ha ka chnong Saitual yow suk ki u lai u wan.
Neiliang ka MLA hawa e yei klam da yaroh ko ya kiwa chong chnong kamjooh kiwa yahkhmat chnong deilang ka yung krehkaam ka Border Areas Development Officer (BADO), Khliehriat yei ya krehlang ki yow pyntikna wa ini i kaam man i iwa jop wei wow wanrah myntoi ya kitu kiwa sah ha thaaiñ khappood.
Da ong ko leh wa kani ka yingkieñ daw pynsuk pynjan ko ya kitu kiwa sah ha ka chnong Saitual yow lai cha Ratacherrra, Umkiang wa kiwi de ki thaw.
Neiliang won u waheh chnong ka Ratacherra, u Pynkhlain Dhar hawa e yei klam da yaroh u yei ye u pyndep yei kreh deiwa khana leh katwon chem chitom kiwa na Saitual wow kaap ya ka um kamjooh kiwa na Ratacherra kiwa lai rep lai riang cha kani ka thaw wei kattu deiwa em kani ka yingkieñ daw pynwiar lut yeini i chem chitom.
Discussion about this post