Ka Super Division ka West Jaiñtia Hills District Sport Association (WJDSA) kawa tip leh kam ka ‘U Kiang Nangbah Memorial Trophy 2023’ da poi ko cha ka sngi wa arphaw-phra ynne deiwa pynman ka wi ka yalehke kawa man leh ka yalehke wa khaddooh chwa wow sdang noh ka Semi Final.
Ka yalehke wa da pynman toh hapyrdi ka Ladthadlaboh waka Shangpung Lumiawmuchai heiwa da Ladthadlaboh da jop ko da 5-0.
Ya ki kool ka Ladthadlaboh da thap da u Daunisakhiat Dkhar haka minit wa 8 katwa ki soo tylli kiwi won da thap da u Banteilang Shylla haka minit wwa 56, 70, 72 wa 90+3.
Ka Ladthadlaboh kattu da jop ko 6 sien wei da rem ko chisien katwa ka Shangpung Lumiawmuchai da jop ko ar sien wei rem ko san sien.
Ki Semi Final wa daw pynman toh le tylli haka 4, 5 wa 9 tarik.
Ka Semi Final wa nyngkong wa tip kam ka Qualifier kawa daw pynman haka 04-12-23 heipor 1:00 waje i sngi toh hapyrdi ka Ladthadlaboh waka Sailung Ialong.
Ka Semi Final wa ar wa tip kam ka Eliminator kawa daw pynman ha ka 05-12-23 heipor 1:00 waje i sngi toh hapyrdi ka 7 Wasa waka Nangbah Mulang.
Ka Semi Final wa le wa daw pynman haka 09-12-23 heipor 1:00 waje i sngi toh hapyrdi kawa rem haka Semi wa nyngkong wa kawa jop yaka Semi wa ar iwa mut wa kiwa jop yaka Semi wa nyngkong da psiah ki sak cha ka Final.
Discussion about this post