Super Division: Jop ka Nangbah Mulang, khlem wa jop hapyrdi ka Wahiajer wa Ladthadlaboh

Ka Super Division 2024 ka West Jaiñtia District Sports Association (WJDSA) kawa tip leh kam ka ‘U Kiang Nangbah Memorial Trophy’ da poi ko cha ka sngi wa 15 ynne deiwa pynman ar tylli ki yalehke kiwa man leh ki yalehke wa khaddooh chwa wow sdang syndon ki yalehke Semi Final.

Ha ka yalehke wa nyngkong, ka Nangbah Mulang da jop ko ya ka Sailung Ialong da 3-0 lyngba ki kool wa thap u Roland Shylla ha ka minit wa 11, u Niponghi Sumer ha ka minit wa 25 wa u Soniroy Suchiang ha ka minit wa 45+1.

Ka yalehke wa ar da kut ko 2-2 hapyrdi ka Wahiajer wa Ladthadlaboh.

Ya ka Wahiajer da thap da u Riburom Jat ha ka minit wa 35 wa u Diceduous Pyrtuh ha ka minit wa 80 katwa ya ka Ladthadlaboh da thap da u Buromlangki Salahe ha ka minit wa 54 wa u Jervisly Rymbai ha ka minit wa 90+2.