Da i lehbha ha waroh i liang, ka Meghalaya da jop suk ko yaka Arunachal Pradesh da 9 Wicket haka yaleh wa soo yong ka haka Syed Mushtaq Ali Trophy T20 Tournament kawa pynman ynne ka sngi ha Chennai.
Ka Arunachal da jop ko yaka kylla khlem wei da jied ko wow Bat nyngkong wei da man ko ka sien wa nyngkong ha kani ka Tournament wa ka Meghalaya da yoh ko wow kdong.
Ka Arunchal da ye ko wow kamai du 84/8 na ki 20 Over iwa ka Meghalaya da ye ko wow kdong suk haka 14.5 Over deiwa dooh chi Wicket donhi.
Ka Meghalaya da pynemkaam ko ya 5 ngut kiwa kawang bol ynne ka sngi, heiwa le ngut da yoh ki mar ar Wicket – Abhay Negi (2/10), Kilco Marak (2/18) wa u Akash Kumar Choudhary (2/26). U Sanjay Yadav (1/12) wa u Aditya Singhania (1/18) leh da yoh Wicket ki. Na kiwa Bat ka Arunachal uwa ym em chah pynhaap wei uwa kamai boon Run dooh toh u Akhilesh Sahani uwa da yoh 41 na 33 bol.
Hawa kdong Run, u Rohit Shah wa u Ravi Teja da kamai lang ki 66 Run neibynta ka Wicket wa nyngkong. U Shah da haap u deiwa kami 26 Run haka 13 Over heiwa da wan u Yadav uwa ym em pynlut por deiwa smait u 18 Run na ki 7 bol yow pynjop yaka Meghalaya deiwa yoh 88/1 na ki 14.5 Over. Ha chilliang won, u Teja da yoh u 36 Run (Not Out).
Ka Meghalaya kattu da jop ko la arsien tangwa dang neh ko heiwa 5 wei daw yachem ko waka Sikkim haka sngi wa ar.
