Ka Yaseiñ Synod Rangbah kawa arphaw wa da pynman ha Balang Barato, West Jaiñtia Hills kawa da sdang nadooh ka 17 tarik da kut noh ko ynne ka Sngi U Blai deiwa wan sakhi ki paaid wa ngait wa boon wow chah chkoor ya ka ktien u Blai najrong ki kynrem ki lyndang wa ki bru paawkhmat waphær waphær.
U Rev. W.P. Marsing hawa saam yaka khubor naka ktien u Blai haka yaseiñ sngi, da chim u naka kitab Eksodos lynnong wa 4, dkhot 21 wei ka bynta wa kongsan yong kani ka khubor toh chaphang u dieñchdooh yong u Blai.
Hadien i pynsñiaw yaki kattu katni tylli ki bynta na katai ka lynnong waka dkhot, u Rev. Marsing ong u wa i bor wa phylla yong u deiñchdooh u Blai toh wa wai u ki luti hapyrdi i chem jynjar wym yoo emlaad de.
Kamtæ heiyatoh wa i im kam ki bru, ong u wa tyngkhooh i chiboon i eh i khoo, la hei kjut chitom, i duk i dooh wei kamjooh i jia wa khlem poi pyrkhat wa wan mih hawa im i kamwa ki khon Israel maad ki yei eh katwa dang lai luti deiwa tyngkhooh ki yaka duriaw rong soo katwa nadien won kdong ki chipai u Pharaoh, tangwa u Blai da wai u ka laad ka luti yow lait ki nei chah pynyap wa toh du u dieñchdooh u Blai wa ye u pynkaad arliang yaka duriaw rong soo.
Kamjooh leh ha i ki bru la jia maad yei kut laad, tangwa hap man won i kam kiwa ngait wei chaniah ha u Blai, oo hi wow wai ki laad ki luti neibynta u pynstiñ yeiwa wan ban i.
Heijooh i por ong u wa u dieñchdooh yong u Blai toh uwa kyrchaan, u dieñchdooh yong u Blai pynmih u ki um wa bang u dih, u dieñchdooh yong u Blai e u yei jop yaka thma.
Lyngba kani ka khubor da khut kyntu kyrsu u yaki Christan wow em i yakrehlang, i yatylli wow man iwi don nadooh ki District Presbytery khnang yow jop yei sih wa boon jait, i sih wei yei eh haki sngi wa katni, najrong wow ye u pyntyllung yaki kaam ka Synod kawa man ka burom yong u Blai.
Heipor step yong ka yaseiñ 10:00 waje won da klam yaka khubor naka ktien u Blai da u Rev. S. Lamare naka Gospel u Lukas lynnong wa 7, dkhot 11 hadooh 17.
Neitæ ha kani ka sngi da yoh i rwai Choir naka yaseiñ khynroo ka Balang Mowtyrchiah, Shnongpdeng, Moobakhon, Moopala, Demthring, Barato wa naka Standing Choir Mowkaiaw Presbytery waka Standing Choir KJP Synod Mihngi.
