Ka dhab ki Montri ka Manipur namo ka Manipur Cabinet ynne ka sngi da chim ki ya ka rai wow pynyoo yei burom ya u Neeraj Chopra deiwa e sñiawbha T. 1 klur neibynta wa yoh u yei takma ksiar ha ka yakob cher soom namo ka Javelin Throw ha ka Tokyo Olympics.
U Montri Rangbah ka Manipur u Biren Singh da pynbna u ya ini ynne ka sngi lyngba ki Social Media.
U Biren da ong u, “Ha kani ka sngi wow sah parom heiwa ka India da yoh ko ya ka takma ksiar ha ka Olympic ha ki yalehke Athletics hadien 100 snem, ka Manipur State Cabinet da rai ko wow burom ya u Neeraj Chopra uwa yoh takma ksiar deiwa e da ka song poisa wa T. 1 klur”.
Da ong u leh wa da ini i jop, u Neeraj da yoh u yei maya ki Billion ngut ynne ka sngi.
U Chopra uwa 23 snem i rta da kawang u ya u soom deiwa jngai 87.58 M yow yoh yei takma ksiar ynne ka sngi. Da ini da man u leh u nong India wa nyngkong wa yoh takma ksiar ha ka Javelin Throw wei uwa ar ha ki yalehke yong samen hadien wa yoh takma ksiar u Abhinav Bindra hei ya siat ha ka Beijing Olympics ha u 2008.
