U Montri ka chnat saam umbaam umdih ka sorkar jylla u Renikton Lyngdoh Tongkhar hawa pynbna paidbah wa ka sorkar da mang ko T. 10 klur tam neibynta u pynyoh umbaam hapoh ka chnong Shilliang Myntang, West Jaiñtia Hills District, da khut kyntu kyrsu u yaki paidbah yong ka chnong wow yakrehlang ki waki bor sorkar neibynta u pynmankaam ya kam ini i kreh kawa toh neibynta i bha i miat ka chnong ka thaw yong ki hi.
Yeini da pynbna paidbah u hawa e yei klam ynne ka sngi haka yalang wai u yaka Fete yong ka skur Presbyterian Shilliang Myntang Secondary School.
Da ong u i daw wa kyntu u yei yakrehlang toh neidaw wa boon ki chnong hawa wanrah Scheme pynroi ka sorkar pyn da ki paidbah hi wa wanrah yei eh deiwa pynthut næ khanglaad, wei na ini i daw ki chnat sorkar emkaam ki yei yakrehlang ki bor chnong waki paidbah khnang wa i kaam u man i iwa lai bait.
“Hawa jia kamni yoh daw sa ki Contractor deiwa ong wym ye de u kreh smat neidaw wa em i pynthut, wei da hap wow kheiñ biang yei lutsan deiwa pynkylla leh yei bai kreh wei neiliang ka chnat krehkaam ymtoh iwa suk u yoh poisa,” ong u Montri.
Ong haroh u wa boon bah ki Scheme kiwa da sahkut daki phaw snem toh du neidaw wa em i thut wei wym yoh i ya krehlang.
Chooh chooh da pynrap u wa kani ka sorkar hapoh i yahkhmat u Conrad da ye ko u wanrah boon ki kaam pynroi, tangwa emkaam i kyrchaan ki paidbah khnang wa iyi wada mang ka sorkar u poi hok cha ki paidbah wei i roi i paar u ku i haka jylla, ki chnong waka thaaiñ.
