Shillong: Ka kynhun ki Montri yong ka sorkar jylla ynne ka sngi da mynjur ki yaka ram wa da poi T.1345.72 klur wow chim na ka Rural Electrification Corporation (REC) wa na ka Power Finance Corporation (PFC) khnang wow su lut noh ya ki ram wa sah yong ka Meghalaya Power Development Corporation Limited (MePDCL).
U Montri ka chnat bordiñ ka jylla, u James Sangma da ong u wa kani ka ram daw yarap ko yaka MePDCL wow pynkhooid lut noh ya ki ram wa sahkut cha ki Company pynmih bordiñ wa kynthup leh ya ka PGDCIL.
Da ong u wa ka MePDCL daw thoh ko leh cha ka Ministry of Power wei kamjooh cha ki Company bordiñ wow pyndam noh yaka 60% wa hap wow su tam neidaw i pynslem, deiwa pynrap leh wa lada dam noh ya katai ka 60%, ka ram wa sah daw hiar ko cha ka T.1091.92 klur.
U Montri da ong u wa ka chnat saam bordiñ ha ka jylla da chah ktah bha ko leh ha ka khlam COVID-19, deiwa pyntip leh wa du ha April 2019, ka MePDCL da yoh lum ko T.65.33 klur, katwa ha u jooh u bnai ha uni u snem da yoh du T.31.02 klur kawa da pynyoo yei mar chiteiñ i yoh.
U Montri da ong u wa hajrong ini i long i man, ka sorkar pyrdi da pynbna ko wow yarap leh ya ka chnat bordiñ da ka Atma Nirbhar Bharat Abhiyan Scheme, wei lada e ya kani ka ram daw pynstiñ ya ka chnat bordiñ deiwa kyrchaan yong ka sorkar jylla.
Hawa kylli, u James da pyntip u wa ka MeECL hadooh u Naisan (May) uni u snem dang sah ram ko ha ka NEEPCO hadooh T. 651.95 Klur.