Ki pulit ka East Jaiñtia Hills District da pyntip ki wa ha kini ki 9 bnai wa da dep, hapoh ka District da yoh kem ki palat 50 ngut ki bru wa emkti wow khayi drug wa boon jait (Narcotic Drugs & Psychotropic Substances). Wei ha kani ka takit da chemdien ya i rukom pyllai yaw ya i drug na Manipur cha Shillong wei da boodien ya ini da ki pulit ka ANTF yow pynwiar noh ya kani ka khayi drug ha kini ki 3-4 bnai.
Kamtæ haka 15 tarik uni u bnai heipor 8:45 i miet da pynsangeh ya kawi ka kari Maruti Suzuki Swift wa em ya u Number ML-05-L-8177 ha Khliehriat, wei hadien wa thooh da chem ya 430.01 gms i Heroin wa song ha 40 tylli ki tadong sabon, da antaad wa chongdor ini i drug T. 2.5 Klur.
Da kem leh ya ki le ngut kiwa tip pyrtuid kamni ha wah:
U Thangsiam Haokip wa tip leh kam u Robinson (24 snem) uwa na Msonggel, PO – Tuibong, PS/District – Churachandpur, Manipur.
U T. Sonlian (22 snem) uwa na Zogam Bazar Zenhang Lamka, PS/District – Churachandpur, Manipur.
Ka Hatneikim Kuki (21 snem) kawa na Msonggel, PO – Tuibong, PS/District – Churachandpur, Manipur, kawa sah leh ha Law-u-sib, Shillong .
Da pynngat ya kiwa chah kem hapoh ka kyndon 6(1)2020 u/s 8(c)/21(c)/29 NDPS Act.
Ini man i leh iwa heh dooh i yoh kem Heroin ha East Jaiñtia Hills hadooh ynne ka sngi. Kamtæ u SP da pyntip u wa ki pulit ka ANTF, Khliehriat PS, Lumshnong PS wa Umkiang PP kiwa embynta ha kani daw e buskit ya ki, ya i kaam wa bha wa bait wa ryntih wa da leh ki kam ki pulit.
Discussion about this post