Ka Dhab ki Montri (Cabinet) ynne ka sngi da mynjur ki wow chim kabu ya ka Scheme wa da wanrah da ka Power Ministry yong ka sorkar India neibynta wow pynbha yei rukom saam bordiñ ha ki jylla wei kani ka Scheme man ko neibynta 5 snem.
U Montri Rangbah ka jylla, u Conrad Kongla Sangma da pyntip u wa ka sorkar India yow pynbha ya ki chnat saam bordiñ ha ka jylla da wanrah ko ya ka Revamp Distribution Sector Scheme ya kawa da mang T. 3,05,984 klur neibynta waroh ki jylla hapoh ka ri India.
Da pyntip u wa neiliang ka sorkar ha ka bynta kawa nyngkong (First Phase) da chim ya ka rai wow chim T. 2500 klur na kani ka Scheme. Katkam i ong u Montri Rangbah, lyngba kani ka Scheme ka sorkar jylla daw yoh ko leh ya ka Subsidy kawa man T. 1350 uwi u Meter katwa kawa tam daw leh da ki Company samen kiwa ya krehlang wa ka sorkar jylla neibynta wow pyndait ya ki Smart Meter. Da pyntip u leh wa i pynlut ya ki tiar wa i chna u man ko 90% na ka sorkar pyrdi wa 10% u man ko na ka sorkar jylla.
U Conrad da ong u wa i pynkrehkaam ya kani ka Scheme ye u sdang hadooh u snem 2022 neibhah daw chim por wow pynsñiawthooh ya ki paidbah hadooh 8-9 bnai hawa yatoh wow pyndait ya ki Smart Meter.
