Ka Dorbar Chnong Panaliar, Jowai lyngba u Waheh chnong, u Riquoma Rq Laloo wa u Secretary, u C. Phawa ynne ka janmiet da pynbna paidbah ki ya ki kyndon wow pynrkhiñ hapoh u pood u ang ka chnong iwa toh neibynta i bha i miat kamjooh i chongsuk chong chngaaiñ ka imlang sahlang.
Ka chnong da khang pyrchah ko u dai kiwon kiwon ki jait dih pynmuaid hapooh u pood u ang ka chnong nadooh i kiad, u bhang, i drugs wa kiwi kiwi hanla ki aiñ chnong toh kiwa da em nadooh nachwa leh chim ki wow pynkynmoo biang yeini.
Heiyatoh wei kiad la jia wa ka chnong chem ko ya kiwa leh pyrchah daw phah su kuna T. 20,000 ya kiwa dai wa T. 10,000 won ya kiwa dih.
Heiyatoh wa kiwa dai drug won ka kuna u man ko T. 50,000.
Ya ki paidbah wa bien u pyntip cha ka chnong daw e buskit yaki T. 4,000 deiwa murieh yei pyrtuid yong ki.
Heijooh i por da khang leh ya kiwa chnong dih hapoh kari chawa doom neibhah boonsien yei jhep wa mih naki da noh taroi ki hapoh chnong wei neiliang ka chnong daw uiñ paitsiar ko hapoh u pood u ang ka chnong.
Neitæ da pynkynmoo biang leh ya ki kyndon chnong wada em chwa, wa ki dukan toh u khang ki hapoh 10:30 i miet.
Ya ki kari wa psiah hapoh chnong leh da khang pyrchah wow pynheh sur, u yah pynhær, wei da kyntu ya ki paidbah wow e ki yei Number kawon kawon ka kari wa leh pyrchah khnang wa ka chnong u leh ko yeiwa emkaam.
Da khang leh ya kiwon kiwon ki kynhun, ki seiñ wow leh ki iwon iwon hapoh u pood ka chnong khlem yohbor, wei kitu wa leh Home Delivery wow pynpoi kiad cha yung bru leh toh u yoh bor chwa ki na ka chnong.
Ya kini ki kyndon ka chnong da rai ko dei yakrehlang ka Executive Committee ka dorbar chnong, ki VDP chnong, ka seiñ kynthai, seiñ khynroo, ka Sports & Game Committee wa kiwi neibynta i bha i miat i khooid i jngiar, deiwa khut leh yei yakrehlang yong waroh.
