U Executive Member wa pait ya ka chnat Development & Building ha KHADC, u Teiborlang Pathaw da pyntip u wa ka Council da pynlut ko kamwa T. 80 klur ha ki soo snem neibynta wow chna yeiwa emkaam ka Council, wa kynthup nadooh u snem 2016 hadooh 2020.
Hawa jubab ya iwa kylli wa da wanrah da u MDC ka Mylliem, u Ronnie V Lyngdoh ha yung dorbar ynne ka sngi, u Teibor da pyntip wa i pynlut neibynta i emkaam ka Council kynthup ki neibynta i thaw yong ki paidbah hadooh u snem 2018, tangwa hadien ini, neiliang ka chnat da bichaar bniah ko ya i pynlut yow man ko du neibynta i emkaam ka Council.
Da pyntip u wa ha u snem 2016-17 da pynlut T. 27,35,34,701 neibynta ki 34 tylli ki kreh wa kynthup leh hei wow chna ya ki sarok lai kari neibynta ki paidbah wei wow chna yaka Court Room ha Langrin Rambrai wa Bhowal.
Hawa jubab yei kylli pynrap, u Teibor da pyntip u wa ka Council ym em yoh ko yei mih na katai ka T. 80 klur neibhah ya katai ka poisa da pynlut hei wow chna donhi ym toh yow pynmih poisa wei ini toh yow pynbha ya i krehkaam ka Council.
Hawa chim yei e yumut yong u MDC ka Mylliem wow bhah lang 10% neibynta ka puræ puthi, neiliang u EM da kular u wow chimkhia wow rah ha ka Executive Committee neibynta wow pynlut leh hawa chna ya ki skur kiwa biang khamtam cha ki thaw nongkyndong.
Ha kawi won ka liang hawa jubab yeiwa kylli wa da wanrah da uwa yahkhmat ka liang pyrchah, u Lamphrang Blah, neiliang u Teibor da pyntip u wa hadooh katni, ki 63 tylli ki kaam chna wa da chna da ka Council toh kiwa da pyndep, katwa 12 tylli won wa dang lai ki kreh chakhmat.
Chooh chooh hawa jubab won yei kylli wa da wanrah da u MDC ka Laitumkhrah, u Fantin J Lakadong, neiliang u EM da ong u wa hadooh katni ka Council ym pu em ko ya ka chnat Tourism neidaw wa ym pu em yoo yeiwa emkaam, tangwa da ong u leh wa ka Executive Committee daw bichaar won ko lada emkaam ha ki por wow wan.
