U MP ka Pakistan uwa tip kam u Shahid Ahmed Khattak, da yieñ u hapoh ka National Assembly ka ri yow beiñ ya u Prime Minister ka Pakistan, u Shehbaz Sharif wa ya u Army Chief, u Asif Munir hadien wa ka India da ye ko wow siat suk ya kiwa boon ki thaw wa em ha Pakistan.
Uni u MP da ong u wa u Prime Minister ka Pakistan ym nood u tang wow pynemkaam yei pyrtuid u Modi wei da rieh u kam uwa tieñslah (Buzdil) wei hawa beiñ ya u khlieh ki chipai ka Pakistan da ong u wa uni u bru toh u myrsiang ymtoh u sing hadooh wa ki chipai da man ki kiwa da dooh mynsien.
Da ong u leh wa kiwa boon wa em hapoh kani ka yung dorbar toh kiwa em thaw cha baar ri wei daw yut ki cha London, em kiwa daw lai cha Dubai wei em leh kiwa em yung em sem ha Europe. Tangwa i kiwa boon daw hap i wow neh ha Pakistan hi wei lada kamni ym em wa bien u yieñlang wa kiwa yahkhmat.
Da kam u leh wa da yoo lakam wa ka ri Pakistan toh ka wym em bor hawa ki chipai yong ka ym em chlur ki.
Ha kawi won ka khubor, u Defence Minister ka Pakistan, u Khawaja Asif da chah klam beiñ u heipor wa yaklam u wa kawa thoh khubor ka CNN kawa da paan na oo ki sabut wa siat ka Pakistan ya 5 tylli ki Jet ka India heiwa ym ye u wow e iwon iwon i sabut.
Discussion about this post