Ka thaaiñ Northeast ka ri India da chah ah ko tdot na kiwi ki ri wa em chajan khamtam ki ri ka South East Asia hadien wa da pteiñ ka thma ha Iran iwa da ktah yei poi phniang (Aviation Fuel) wei deiwa ku dor leh chawa palat.
Ka Northeast em ko le tylli ki International Airport kawi ha Guwahati, Assam, kawi ha Imphal, Manipur wa sa kawi ha Agartala, Tripura tangwa lait na ka Airport wa em ha Guwahati kini kiwi toh ki wym em li lieñsuiñ wa lai cha baar ri lait noh ka Agartala kawa em i por wa em ka lieñsuiñ wa lai cha Dhaka, Bangladesh.
Na Guwahati da em ka Air Asia wa lai cha Bangkok, Thailand soo sien chi tayaaw tangwa kani da pynsangeh ka nadooh ka 28 tarik u April deiwa ong wa ye u sdang won ha ka 24 tarik u October ha uni hi u snem.
Ka Air Asia da pyndam ko leh ya ki lieñsuiñ ko kiwa lai cha Bangkok na kiwi ki Airport wa em ha India kam kawa na Ahmedabad, Jaipur wa Lucknow deilang leh kawa lai na Kathmandu, Nepal cha Bangkok.
Ka Air Asia da e daw ko wa da joor syad dor wow pynlai ya ki lieñsuiñ ko na kiwa boon ki thaw kam na Bangkok cha Bali, Singapore, Hong Kong Kuala Lumpur wa China.
Da pynam ko leh ya ka lieñsuiñ wa lai cha Phuket, Thailand na Kochi.
Ha kini ki bnai nadooh wa sdang ka tham, i dor phniang da ku dor i da le chah wei da sdang leh wow duna ki bru wa lai luti hadooh wym yoh nong de kiwa pynlai ya ki lieñsuiñ.
Iwa ye wow yarap kattæ toh deiwa wan ka lieñsuiñ ka Bhutan, ka Druk Air kawa wan na Paro deiwa hiar ha Guwahati yow lai cha Bangkok ar sien chi tayaaw ha ka sngi Thursday wa Sunday tangwa ym ye won wow nujor wa i duna dor wa chim ka Air Asia.
Discussion about this post