Jowai: Ka East Jaiñtia National Council (EJNC), kawi naki seiñbhalang napoh East Jaiñtia Hills District kawa embynta lang haka chatri yong ka Confederation of Meghalaya Social Organisation (CoMSO), da pynsñiaw ko yei sñiawkhia kawa khroo hajrong i kyrchaan yong ka Agatha K Sangma, MP yong ka NPP yaka Citizenship Amendment Bill 2019 yong ka sorkar ka BJP.
Ka jylla Meghalaya waroh kawi kamjooh ka sorkar jylla wa da yahkhmat daka NPP ki dang pyrchah joor ki yaka CAB, deiwa tieñ wa ya chah thyllep noh ha kiwa wan phet chnong kiwa wan na Bangladesh lyngba ka CAB, tangwa kani ka MP yong ka NPP napoh Tura Constituency, da kyrchaan ko ya ini i thmu buitpoh yong ka sorkar BJP wow pyndooh jait ya i kiwa khian paaid lyngba ka CAB, wei ini i kyrchaan yong ka Agatha yaka CAB da man ko i chet kylla yaka jylla Meghalaya, da ong ka seiñ.
Ka EJNC da pynsñiaw ko leh yei sñiawphylla wa kammon ka jooh ka Party em ko ha waroh arliang wow pyrchah wei wow kyrchaan yaka CAB, wei da dawa na u montri rangbah ka jylla uwa man leh u National President yong ka NPP wow pynche u hajrong ini, wei lada ym ye u wow pynche, da pynyoo waka NPP ka yalehke Politics ko waka yap ka im yong ka jaitbru yong ka jylla hi waroh kawi, ong u Sambormi Lyngdoh President EJNC, da pynrap u deiwa ong wa lada ka sorkar jylla (MDA) wa yahkhmat daka NPP, UDP, HSPDP, PDF ki pyrchah sakhiat ki yaka CAB toh u pynyoo ki noh ki daki kaam ym du wow pyrchah du ha ki kot khubor.
Ka EJNC ka pynrem joor ko leh yaka sorkar BJP kawa da yooh beiñ ya i mantre yong i ki khian paaid wei da dawa na kiwa yahkhmat yong ka BJP kiwa em napoh EJHD wa naka jylla hi waroh kawi kiwa dang em ka mynsien wow yada yaka jaitbru wow mih noh ki naka BJP kam ka dak pyrchah.
Ka seiñ da thang ko leh yaka dur bula yong u Narendra Modi, Amit Shah wa u Lat ka Meghalaya hakhmat u mot sahkynmoo u Kiang Nangbah, ha Khliehriat East, EJHD, kam wym pdiang yaka CAB 2019 wei wow dawa pynkrehkaam yaka ILP hapoh ka jylla Meghalaya.
Discussion about this post