Thang ka KSU ya i dur bula u Modi wa u Shah, maham pynkrehkaam da ki aiñ ka seiñ

Shillong: Kam ka dak wow pyrchah joor ya i wanrah ka sorkar India ya ka Citizenship Amendment Bill, 2019 wot hapyrdi i pyrchah na ki seiñ wa boon ka thaaiñ mihsngi, ka Khasi Students’ Union (KSU) ynne ka sngi da thang ko ya i dur bula u montri rangbahdooh ka ri, u Narendra Modi wa yong u montri ka kaam pohyung, u Amit Shah.

Ka KSU ynne ka sngi da pynman jhan ko yaka yalang yong ka Central Executive Committee wow pyrchah joor ya i wanrah ka sorkar India ya ka Citizenship Amendment Bill, 2019 ha ka dorbar Lok Sabha.

Hawa klam wa wa ki laad pathai khubor, u President ka KSU, u Lambokstarwell Marngar da ong u wa lada ka sorkar pyrdi pynman aiñ ko yaka Citizenship (Amendment) Bill (CAB), ka KSU ka ym yohsa ko wow pynkrehkaam da ki aiñ yong ka hi yow kdoh yei wan psiah kiwa na baar cha ka jylla Meghalaya.

Da ong u wa i yaklam yong ka sorkar India wow pyllait ya ka CAB na ki thaw wa em hapoh ka Sixth Schedule toh du wow pynbiej ya ki paidbah ka Meghalaya, neibhah nadooh u snem 1952 da em ka Sixth Schedule wei neiyi i daw wow yaklam ya i jooh chi i jooh wow beh ya kiwa na baar.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U Marngar da ong u wa ka KSU ka em ko 700 tylli ki chnat krehkaam wei kini ki chnat daw chim ki yaka bynta wow pynkrehkaam ya ki aiñ ka seiñ deiwa pynrap wa ka seiñ hadooh katni da beh ko hadooh kamwa 10,000 ngut ki baar jylla kiwa wan psiah pyrchah yaka aiñ.

Uwa yahkhmat ka KSU da beiñ joor u yaka sorkar jylla kawa ym pu ye u pynkrehkaam yaka Entry wa Exit Point nalor wa ki pynbna wei wow pynkrehkaam ya ki District Task Force leh da sahkut hadooh katni hanlada ya ini da dep wow mynjur nadooh u snem 2016.

Da kynthah u leh yei wym chimkhia na ka sorkar jylla wa katni wa kiwa da lai wow wanrah ya ki aiñ wow yada ya kiwa chong chnong nei chah tyllep ha ki bru wa na baar.

U Marngar da ong chooh chooh wa lada ka sorkar jylla sñiawkhia wei pyrchah sakhiat ko yaka CAB toh u pynkrehkaam ko ya aiñ wow yada ya ki paidbah ri-loom nei chah tyllep ha kiwa na baar.

Hawa kylli hajrong i kyrchaan yong u Lat, u Tathagata Roy ya ka CAB, u President ka KSU da ong u wa u Lat ka jylla toh u khon khaddooh ka BJP, wei lada u Lat yachah chilliang u ym man ko kawa biang wow chnong ha kani ka jylla, deiwa pynrap wa kamwa da klam da che wa klam u ya iwa wan na ka BJP.