Nongstoin: Ki seiñ waphær waphær kiwa na West Khasi Hills District kiwa kynthup ya ka WKSU, HYC, Youth For Change na Mairang, HANM, WYF, HNYF, Synjuk Ki Seng Samla Shnong West Khasi Hills, Seng Samla Shnong Mawkawah, Seng Samla Shnong Mawїawet, Seng Samla Shnong Mawїong Lumsyntiew, Seng Samla Shnong Ladweitang wa ka Seng Samla Shnong New Nongstoiñ, da pynman ki ya ka yalang wa jhan heiyatoh wa chah klam beiñ ki paidbah ka thaiñ ha ka Editor yong ka Shillong Times, ka Praticia Mukhim kawa da ktah yei sñiaw ki paaid wa chong chnong yong ka West Khasi Hills District waroh kawi.
Hadien katai ka yalang kini ki seiñ kam ka dak pyrchah ya ki kyntien klam beiñ yong katai ka Editor kiwa da thoh ha ka kotkhubor, kini ki seiñ da thang leh ya ki kotkhubor Shillong Times hapyrdi yaaw yong ka chnong Nongstoiñ.
Hawa yaklam wa kiwa pathai khubor, u D. Sun (General Secretary yong ka West Khasi Student Union) uwa yahkhmat leh ya kani ka yalang da ong u wa neiliang ka synjuk yong ki seiñbhalang da dawa ki naka Praticia Mukhim (Editor) wow pynche wei wow pynsakhiat hajrong wa mih ha ka kot khubor Shillong Times ha ka 8 tarik uni u bnai.
Katam i thoh ha katai ka kotkhubor da pynbaad wa ki khynnah khynroo yong ka West Khasi Hills kiwa da chimbynta ki ha ka yakhih ha Motphran da chah pynbaam poisa ki, i pynbaad wa ka West Khasi Hills ym wanrah ko iyi i mih næ i yohnong ya ka jylla, i pynbaad wa ki khynnah khynroo ka West Khasi Hills toh kiwa wan booh ha Shillong neibynta ka yakhih ha Themmator.
Neidaw kini ki chah pynbaad neiliang ka synjuk da rai ki wa ha kani ka kynti u khang wow dai ya ka kotkhubor Shillong Times ha ka thaiñ West Khasi Hills nadooh ynne ka sngi hadooh wa ka Editor u paanmap ko ha waroh ki laad pathai khubor deiwa booh por chitayaw.
Heijooh i por ki synjuk yong kini ki seiñbhalang da kyntu ki leh ya kiwa chong chnong yong ka West Khasi Hills wow yaichah ki wa ki seiñbhalang heiyatoh wa kani ka kaam wei wow kyntait ki leh chipor wow dai wei wow thied ya ka kot khubor Shillong Times.
Discussion about this post