Mawkyrwat: Le ngut ki kyrtong wow yakhun ya ka Election chiteiñ samoi na Ranikor Constituency, ynne ka sngi da thap pyrtuid ki ha yungkrehkaam ka Deputy Commissioner ka Mawkyrwat, SWKH.
Kini ki le ngut kynthup ki ya u Martin M Danggo ka NPP uwa man leh kam u MLA warim, u Pynshngain N Syiem naka PDF wa u Jacques Sangma naka Congress.
Hawa yaklam wa kiwa pathai khubor, u HS Shangpliang MLA ka Mawsynram Constituency, da ong u wa kani ka Election ym toh ka Election wow pyndap pyrtuid namo wow e laad ya kiwon kiwon wow yaleh wei da yaleh leh yow jop hi. Neiliang ka seiñ Congress da pynpaw ko wow kreh chitom wow pynjop ya u Jacques Sangma ha kani ka Election.
Neiliang u Pynshngain N Syiem da ong u wa i thmu yong oo wow pynmih ya u kyrtong wa ya hunlang (Common Candidate) da chana wa ki bru yong ka thaiñ Ranikor da yoo biang ki ya oo kam u kyrtong wa da hunlang wei neiliang kiwi ki Party da wan ki wow ksohkti lang wa oo.
Neiliang u kyrtong ka UDP u Pius Marwein ym pu em thap pyrtuid u ynne ka sngi.
I thap pyrtuid ha Ranikor wa ha South Tura u kut ko ha ka 6 tarik uni u bnai, i thap vote ha ka 23 tarik katwa i ñiaw vote u man ko ha ka 27 tarik uni u bnai.
Na South Tura, u kyrtong ka NPP u Conrad K Sangma da dep thap pyrtuid u ha kini ki sngi wa da dep, ka Congress da rai ko wow pynyakhun da ka Charlotte Momin na South Tura kawa man ka Principal warim ka Tura Government Public school.
Discussion about this post