Uwa yalehbol wa pawnaam ka India, u Bhaichung Bhutia da thap pyrtuid u kam u kyrtong yow yaleh yow man kam u President ka All India Football Federation (AIFF) heiwa kiwi kiwa da thap pyrtuid kynthup ki ya u Kalyan Chowbey, Manvinder Singh, Shaji Prabhakaran, N.A. Harris, Eugeneson Lyngdoh wa ka Valanka Alemao.
I jied President ka AIFF toh iwa da sahteiñ da boon snem hadooh wa da poi cha ka Supreme Court kawa da tyngkheiñ ya ka Executive Committee ka AIFF wei da pyndam leh yei man President ka AIFF u Praful Patel uwa da ksoh ya ini i kyrdan la 12 snem khlem pynman Election.
Ini waroh da pynman ko ya ka FIFA wow Suspend ya ka AIFF hadooh wow pyndam noh yei pynman ya ka U-17 Women’s World Cup kawa toh u pynman ha India ha uni u snem neidaw wa chah pyndooh bor ka Executive Committee ka AIFF wow pynlai yei kaam ko wei lada ym ye biang ka AIFF u chim biang yei bor ko ym tipmit biang ya ka AIFF.
Hanla ini da man iwa sñiawsih ya kiwa yalehbol ka India tangwa da chim leh kam ka laad wow pynthymme wei wow pynbait noh yei kaam wa dang sah nadooh wow pynthymme ya ka Constitution ka AIFF kamjooh wow jied President wa thymme.
U Bhaichung da ong u wa kam kiwa yalehbol daw ye bha ki wow leh kiwa boon yow pynku ya ka bol hapoh ka ri neibhah nachwa duna bha wa em pyn da kiwa jooh yalehbol wa pynlai ya ka AIFF wei kani wa katni toh ka kabu wow yoh yei sur kiwa yalehke kamjooh wow e chakri.
Ka Supreme Court daw chong bichaar biang ko ya kani ka mukotduma ha kani ka 22 tarik.
Puræ leh: Chah Suspend ka AIFF ha ka FIFA, chah pyndam leh ka U-17 Women’s World Cup
