Shillong: U Prestone Tynsong da beiñ joor u yaki bru wa pynpoor ya i yaklam deiwa record ha ki phone, heiwa da pynbaad wa ini toh i thmu wow chim kabu saiñpyrthai ha kam ini i por.
Ha kini ki sngi wa da dep da em i pynpoor ya i klam hapyrdi u Montri ka sorkar jylla uwa man u MLA ka Mawthadraishan, u Brolding Nongsiej wa u Secretary ka chnong Nongjlak, kawa da pynbaad wa u MLA da tyngkheiñ u ya ka hukum khang chnong deiwa phah kreh ya kawi ka sarok ha katai ka chnong.
Hawa kylli hajrong ini i klam, u Symbood Montri Rangbah ka jylla, u Prestone Tynsong da ong u wa ini toh i kamram yong ki sahep wa da pynkup bor, wa kynthup nadooh ki DC, SDO wa ki BDO wow khang ya kawon kawon ka pynkrehkaam wa da phah wow khang.
Da pyntip chooh chooh wa hawa pyrchang u wow yaklam wa uni u jooh u bru hajrong katai ka kaam, uni u bru da Record biang u ya i yaklam. Da kylli wa iyi i daw wa emkaam wow record ya i klam wei iyi yoh nong.
Da maham eh u ya kiwon kiwon kiwa pyrchang wow chim kabu saiñpyrthei ha ini i por wa ka jylla em ko hapyrdi i yaleh wow yada na u khñiang kjut wa chyrkhei.
Discussion about this post