Jowai: Ki pulit ka Assam ynne da thmu ki wow pynsangeh yei lehkmen dap 25 snem ka skur Psiar Upper Primary School, Psiar, West Jaiñtia Hills kamjooh leh wow wai ya u mooyurim yong ka Psiar Secondary School.
Ka Psiar toh ka chnong wa haap ha khappod wa ka jylla Assam kawa man kawi na ki chnong wa yaknieh ka Meghalaya wa Assam.
Katkam ka yutip wa da yoh da ong wa ki pulit Assam da wan ki ha ki 4-5 tylli ki kari wei ki pulit na West Jaiñtia Hills kiwa em kamwa 40 hapoh i yahkhmat u DSP D. Moksha mar tip yeini da hiar ki wut-wut cha Moolber wow khanglaad ya kini ki pulit Assam.
Ki pulit ka West Jaiñtia mar poi ha u pood ka Moolber wa ka Psiar da khang luti ki deiwa kah da ki kari yow khang ya ki pulit Assam u wan pynsangeh ya kani ka lehkmen.
Chooh chooh ka yutip wa yoh da ong wa ki pulit ka West Jaiñtia da khang ki ya ki pulit Assam hadooh wa kut ka lehkmen ha kani ka skur.
Kam wow kdaw heini ha kani ka lehkmen toh u wan u montri rangbah ka jylla, u Conrad Sangma kam u kongsan tangwa na ki daw wymye u kiar da wan salan noh da u montri ka chnat Fisheries ka jylla, u Comingone Ymbon kam u kongsan.
Discussion about this post