July 16, 2018

Thmu wow pynwiar ya ka result exam thung kreh ka NEIAH: KHNAM

Advertisement ad1

Shillong: Ka KHNAM-Youth Wing ynne ka sngi, da yachem ko ya ka Dean yong ka North Eastern Institute of Ayurveda & Homoeopathy (NEIAH) Shillong hajrong i suba wa ki bor pynlai ya kani ka thaw, thmu ki wow pynwiar ya ka result yaleh exam kreh kawa da pynman ha u bnai wa dadep ya ka Personal Interview.

Hei sakhiat kiwa yahkhmat ka KHNAM-YW, da thmu ki wow yachem ya u Director tangwa ym em u, wei da yachem noh ki ya ka Dean kani ka thaw, ka Dr A Roy. Da em kamwa 40 tylli ki kreh wa lait wei da pynman ya ka exam ha u snem 2016 tangwa em ki kattu katni ki kreh ympu em u pynbna ya ka result.

Advertisement ad1

Hawa klam wa u Thomas Passah, president ka KHNAM-YC da ong u wa u Director rap nachwa, da e daw u wa i wym pynmih ya ka result toh neidaw wa phah ki bor wa hajrong, na Delhi wei hadien wa wa paan yutip wei da ka RTI leh ym em u yoh ya ka jubab kawa biang.

U Thomas da kam u wa da yoh yutip wa em i thmu wow wanrah bru na Assam wow thap ha kini ki kreh wa ym em pynbna tangwa neiliang ka KHNAM ym elaad ko ya kam ini i leh kani ka thaw.

Da ong u wa em ki thaw puræ ha kani ka jylla kiwa toh wow wan e myntoi ya ki tre chnong tangwa ym em yumut ini i wan yong ki.

Heijooh i por da ong u wa lada kiwa pynlai ka NEIAH ymye ki wow pynmih ya ka result, ka seiñ daw ujor mukotduma noh ko pyrchah ya u Director, wei lada pynman exam biang deiwa khut ya ki bru kiwa na baar, ka seiñ ym elaad ko ya ki.