Ha ka 13 tarik uni u bnai, ka seiñ Jaintia Students’ Union da pynhær chithi ko cha u Union Home Minister u Amit Shah wow chimkhia ya i wan psiah laitlan ki bru wymman na Bangladesh cha ki thaw khappood kam cha thaaiñ Dawki chadooh Muktapur wa ha ki thaaiñ Shella, East Khasi Hills District hadooh wa ini da pyndooh ko ya i chongsuk ha u khappood waroh kawi.
U Treiborlang R Suchen, President JSU (Shillong Circle) uwa man leh u tre chnong na ki thaaiñ khappood da ong u wa i wan psiah ki nong Bangladesh ym toh du ha kini ki bnai wa da dep tangwa da jia i na i por cha ki por kiwa da wan toor chapoh chnong, chapoh bri wa cha sarok wa chajan man i por wei rah ki ya ki wait wa ki tiar pynmynsoo kiwa nep yow pam naphang wei wow lute ya kiwa lai wa wan ha ki chnong khappood kamwa da yoh wow sakhi ha kini ki sngi kiwa da dep ha kylleiñ ki thaw khappood Indo-Bangla.
Ka seiñ da dawa ko na u Union Home Minister u Amit Shah wa ka sorkar India toh u leh ko iyi re iyi wei wow phah leh ya ki BSF yow man ki kiwa kitkhia wow pait ya ki thaw ki wym pu em kær sainar wei wow wanrah rap boon ki chipai BSF cha kini ki thaw na Dawki cha Muktapur wei kamjooh ha chnong Shella kawa em ha ka thaaiñ khappood wei wow booh leh daka Special Border Unit khamtam wa da krehkaam ka CAA.
Ka seiñ da ong ko wa ym yohsa ko wow thoh cha ka chnat Ministry of Home Affairs yong ka sorkar India neibhah hadien wa ka seiñ da dep ko wow yachem wa ki montri sorkar jylla, ym ye ki wow wanrah ya ka chongsuk kawa paka ha kini ki thaw wei da booh da ki pulit chipor wow sonteri ya kini ki thaw (short term solution) wei emkaam wow thooh yaka laad wow pyndooh syndon ya ini ym toh du chibet chipor.
Ka JSU da beiñ ko leh ya ki chipai wa yang khappood ka Bangladesh ki Border Guard of Bangladesh neibhah wa toh ki kiwa e laad ya ki bru yong ki wow psiah pyrchah yaka aiñ cha India.
Discussion about this post