Ka KSU Lapangap Unit haka 11 tarik uni u bnai da lai booh ko dei thoh cha ka yung krehkaam u Executive Engineer yong ka PWD North Division yow pynkynmoo ya u Engineer wow sdang noh ya i kreh ya u sarok PMGSY uwa tip pyrtuid kam u KLB (Khanduli Barato Lapangap) Road uwa em kamwa 18 Km na Barato cha Lapangap.
Ka seiñ hei thoh yong ka da kyrpaad ko ya u Executive Engineer wow sdang noh u pynkreh ya utai u sarok na Lapangap cha Barato neibhah wa da toh i por iwa biang bha wow pynkreh ya utai u sarok khamtam ha kini ki bnai wa rang slap.
Hajrong ini i jooh, neiliang ka seiñ ha ka jooh ka sngi da lai pynsñiaw ko leh cha u Deputy Commissioner ka West Jaiñtia Hills u Garod LSN Dykes hajrong u pood u ang wei wow kyrpaad yow pynkreh ya utai u sarok PMGSY yow pynsuk ya i lai i wan ha i kjut i chitom yong ki paidbah ka chnong Lapangap.
Neiliang yong u DC da kular u leh wow phah dei thoh cha ka chnat PWD wow pynkreh noh ya utai u sarok khlem da pynslem.
