Jowai: Ka seiñ North East Dialogue Forum (NEDF) da thoh ko cha u Union Minister for Home Affairs, hadien wa kani ka chnat sorkar pyrdi da e bor ko ya ki chipai ka Assam Rifles wow kem naphang ya ki kiwa na 5 tylli ki jylla kiwa em pood waka ri Myanmar kitæ ka jylla Arunachal Pradesh, Assam, Manipur, Mizoram wa Nagaland khlem em i daw.
Ka NEDF da ong ko wa da sñiawphylla wa ka sorkar da chim ko ya kani ka rai hawa da em ka BSF kawa pait ya u pood wa kiwi ki ri wei wow krehlang waka State Border Wing Home Guards wa ki Village Defence Party yow pait ya i psiah tooh chapoh ka ri kamjooh kiwa mih.
Ini ym em mut wow e bor leh ya ka Assam Rifles namo ya ka BSF wow kem naphang khlem em de ka aiñ. Neibhah ini daw ktah ko khamtam ya ki thaw wa em cha khappood heiwa daw boon ki bru wa ym emkti ha kiwon kiwon ki kaam wa sih daw chah ktah ki.
Ka NEDF da ong ko leh wa ka sñiawthooh ya iwa jia ha Rakhine State ka ri Myanmar, heiwa da em ka yaleh wa joor hapyrdi ki chipai Myanmar waka chipai ka jaitbru Arakan iwa da ktah ya ki tre ri ka Myanmar. Wei ka seiñ da thoh ko leh cha Union Minister for External Affairs ha ka 21 tarik uni u bnai yow kyntu ya ka sorkar India wow chimkhia ko wow wanrah yei suk ha kani ka thaw.
Chooh chooh ka NEDF da ong ko wa ym em yooluti wa daw booh da ka Assam Rifles ha khappood wa u pood waka ri Myanmar ym wanrah ko yei suk. Wei daw poi ko kam wa pynemkaam ya ka Armed Forces Special Powers Act (AFSPA), 1958.
Ka NEDF da yooluti ko wa i wanrah yei suk toh u man ko deiwa pyrkhat ya ki bru ym toh da ka um snam yow lait leh u wanrah yei ya choon para bru, kamtæ da kyntu ya ka sorkar India wow pyndam chwa wow pynkrehkaam ya ka hukum ka Ministry waka Union Government.
Ini toh katkam wa pyntip u Dr. P.B.M. Basaiawmoit neibynta ka NEDF.
Discussion about this post