Thoh u John cha ka sorkar jylla wow pynkylla ya ki aiñ wa ki tre paar moo hap ki wow chim wai pyn yaka paar yong ki

Shillong: U John F Kharshiing, Chairman ka Grand Council of Chief da ong u wa ka sorkar Meghalaya heithaw wow phah ko ya ki tre yong ki paar moo wow chimwai ki pyn ya ki paar yong ki hi deiwa phah chim da ka Permit, wei neibynta kani da thoh u leh cha ka sorkar jylla deiwa kyntu wow pynkylla smat noh ya ka Coal Mines (Nationalisation) Act, 1973.

Da pyntip u wa haka chithi wa da phah u cha u Montri Rangbah ka jylla, u Conrad K Sangma wa cha u Symbood Montri Rangbah, u Prestone Tynsong da pynsñiaw u wa katni ki bru ki wakreh ya ki kaam paar moo da kulmar yumut ki hadien wa ka sorkar da pynbna ko wa ki tre yong ki paar moo kiwa em ha ka jylla hap ki wow chimwai na ka sorkar yow ye ki u kreh pyn ya ki paar moo yong ki.

“Nga thoh O cha u Montri Rangbah neidaw wa ha kawi ka liang ka sorkar jylla da mynjur ko ha ka yung dorbar Meghalaya Legislative Assembly nadooh u snem 2015 wow pynlait ya ka jylla na ka Coal Mines (Nationalisation) Act, 1973, kynthup ya ka Coal Bearing Areas (Acquisition & Development) Act, 1957 wei kamjooh ka Mines and Minerals (Development and Regulation) Act 1957, tangwa ka sorkar ym em ap ko ya ini i rai yong ka yung dorbar ka jylla Meghalaya kawa da mynjur wow pynskem ya kani ka rai hadooh le sien,” ong u John.

Da ong u wa toh i kamram yong ka sorkar wa ki aiñ næ ki kyndon ym toh wow booh ko yei eh ya ki paidbah, deiwa pynrap wa katkam ka Instrument of Accession and Annexed Agreement (IOA&AA) yong u Naikhynde 17, 1948, ka sorkar India da mynjur ko wa ym ye wow chna ya ki aiñ kiwa ye u ktah hajrong i mantre yaka khyndaw.

Related posts

Hapoh dorbar ym lait ki tang u ang tangwa cha lait pynheh ki kam ki rem dorbar pynksan cha baar, ong u Titos ya ka EC ka VPP

June 26, 2025

Wanrah i ka mang tangka kawa boon dei yoh yei lut | Da pyndam leh ya ki Committee wa pynlut phut: VPP

June 24, 2025

“Nga kyrpad O ya ka sorkar jylla wow chimkhia wei ki ktien ha ki kyndon næ ki aiñ toh u man ki kiwa che, neibhah katkam ka Section 15 yong ka Mines and Minerals (Development and Regulation) Act 1957, ka e bor ko ya u Lat ka jylla wow pynmih ka kyndon wa hap wow chimwai (Mining Lease) ya ki paar næ toh emkaam wow yohbor chwa (Permit). Ka kyntien chimwai da ya tyngkhooh ko ya i rukom mantre yaka khyndaw tynre wei ym che ko,” da ong u.

U John da ong u wa ya kani ka kaam toh wow pynbait noh rap smat waka sorkar jylla wei toh u lai bait wa waroh ki MLA wa ki MDC næ waroh le tylli ki District Council kamjooh ki MP hakhmat u President ka ri India wa hakhmat ka Parliament wow pynsñiaw ya kani ka rai wa da chim da ka sorkar jylla nadooh u snem 2015.

“I kyrpaad i ya kani ka chah kyntait ka rai yong ka Meghalaya Assembly da ka sorkar India toh wow pynbait noh smat, toh leh u rah wa kiwi ki jylla leh khnang wa ka synshaar paidbah u man ko kawa burom mar kylliang hapyrdi ka sorkar jylla waka sorkar pyrdi,” ong u John Kharshiing.