15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Ong ka Hima Mylliem wa bood ko katkam ki kyndon ka aiñ wow dai yaki masi

0 Comments
Advertisement ad1
Advertisement ad1
Advertisement ad1

Shillong: Hadien wa pynbaad ka Khasi Jaintia Butcher’s Welfare Association (KJBWA) wa ka Hima Mylliem ym em ap ko yei eh i khoo kiwa choh doh kiwa thied ya ki masi na ka yaw yong ka Hima kawa em ha Khynde-mer, Khanapara, Ri-Bhoi District. Neiliang u Syiem ka Hima Mylliem u Pa’iem Ainam Manik Syiem da kyntait u deiwa ong wa ka KJBWA ym em pynsñiaw ko ya iwon iwon i eh hawa yatoh waka yaw masi nadooh wa da chimkti kum u kam u Acting Syiem.

U Acting Syiem da ong wa hadooh katni ka KJBWA ym em pynsñiaw ko hakhmat ka Hima ya ki emkaam yong ki, tangwa da yoo du na ki laad pathai khubor ya ka yakhih wow sangeh thied masi na yaw yong ka Hima kawa em ha Ri-Bhoi.

Advertisement ad1

“I sñiawkhia i ya kani ka yakhih yong kiwa choh doh wei nga da phah O leh ya kiwa khroo ka Hima ha ka 26 tarik uni u bnai wow ya pynbait ya kani ka kaam hapoh ka yung krehkaam ka Deputy Commissioner, Ri-Bhoi District,” da ong u.

U Pa’iem Ainam da pynsñiaw u leh yei sñiawphylla wa ka KJBWA ka da rai wa ym ye de ko wow ya krehlang waka Hima ha katai ka yaw neidaw wa ka Hima ym chimkhia ko wei da mih ka khayi tooh ya ki masi na katai ka yaw cha Bangladesh, kawa da pynman leh ya ka KJBWA wow thooh noh da kawi ka yaw ha Byrnihat.

“Na kani ka yakhih yong kiwa choh doh da em ka doohnong kawa khroo ya ka Hima. Tangwa i smat i wow ya krehkaam lang smat ha kawon kawon ka por neibynta i bha i miat ki khon ki hajar,” ong u Syiem ka Hima Mylliem.

Heiyatoh won i pynbaad wa em i challan tooh ya ki masi, neiliang u Montri ka Hima, u MB Kharlukhi da ong u waka Hima hadooh katni da bood ki katkam wa da phah da ka yung krehkaam ka Deputy Commissioner ka East Khasi Hills wow e yaka Transit Pass cha waroh kiwa thied ya ki masi deilang wa i siam chkoor, i pyrtuid ki wa thied wa ki phone number, ki number yong ki kari wa pynkit wei katwon tylli ki masi.

“Uwon uwon uwa khayi uwa thied masi na yaw Khanapara, hap u wow yoh yaka Transit Pass, ka challan na ka Hima Mylliem wa ka Certificate na u/ka Doctor ka chnat V&AH, ya kini ki emkaam u e ha ka sngi yaw wei u krehkaam ki le sngi hadien wa e,” da ong chooh chooh u.

Da pyntip u leh wa hajrong i sangeh wow thied ya ki masi, neiliang ka Hima da pynsñiaw ki leh cha ka KHADC wa cha u Symbood Montri Rangbah wa pait leh yaka chnat V&AH, u Prestone Tynsong.

U Montri Kharlukhi da ong u leh wa ka Hima ym ye ko wow khang laad lada ka KJBWA kwah noh ko da kawi ka yaw, tangwa da pynsñiaw u wa ka yaw kawa em ha Khanapara man ko kawi na ki laad wow pyntikna ya i mantre ka Meghalaya ya katai ka thaw kawa em khappood wa ka Assam.

Heiyatoh won i pynbaad wa wai ya kani ka yaw man ka sngi, neiliang u Montri ka Hima da ong u wa ka yaw toh u wai ko du haka sngi Iewrynghep, tangwa neidaw wa kyrpaad kiwa thied masi, da pyllait wow kit leh haka sngi yaw Shillong wa Pomtiah wow kit pyndep ya ki masi, wei kiwa wanrah ya ki masi leh ki wan ki ar sngi chwa ka yaw.

Chooh chooh neiliang KJBWA da pynbaad ko leh wa em i thied pyrchah aiñ ya ki masi da ki Khasi, neiliang ka Hima da ong ko wa lada chem wa em kam i tæ, toh u ujor ki hakhmat aiñ neibhah tip ware ki para wa khayi.

“Nalor kini waroh kiwa da leh da ka Hima, lada ka KJBWA chem ko i duna, ka dwar ka ka Hima ka wai ko ya kiwon kiwon kiwa e yumut wow khanglaad yaka challan wa pyrchah yaka aiñ wei wow pynbait noh ya i eh,” da ong u Montri Kharlukhi.

Share this:
Previous

Thoh u John cha ka sorkar jylla wow pynkylla ya ki aiñ wa ki tre paar moo hap ki wow chim wai pyn yaka paar yong ki

Next

Wai paidbah u Ri-io Sten yaka yung dorbar ka Dong Pynthor Barato