Jowai: U Vincent Pala, MP ka Shillong, ynne ka sngi da thoh u cha u montri rangbahdooh ka ri u Narendra Modi yow pyllait ya waroh kawi ka jylla naka CAB, 2019 deiwa ong wa hadien wa da mynjur ya kani ka Bill da waroh ar ki yung dorbar ka Parliament, da leh ya ini pyrchah yei mon ki paidbah ka thaaiñ mihsngi kiwa da pynyoo chwa yei pyrchah yong ki.
Da ong u wa hanlada kani ka Bill da pyllait ko ya ki thaw wa haap hapoh ka Sixth Schedule wei ini mut i wa dang krehkaam hi ko ya ki kattu katni ki thaw wa em ha Shillong. Heiyatoh wa ini da kdaw u yaka hukum wa pynmih daka Supreme Court haka mukotduma ka The District Council, United Khasi Jaintia Hills, Shillong V. Ka Drepsila Lyngdoh yow pynyoo ya ki daw wa waroh kawi ka Meghalaya toh u lait ko na kani ka aiñ.
Da pyntip u wa ha kani ka mukotduma da yaleh wa lada ki District Council ye ko wow krehkaam ha ki thaaiñ Bara Bazar hapoh ka chnong Mawkhar, Shillong. Ka High Court da pynbna ko yaka Bara Bazar wa man ko chibynta ka Shillong Municipality neidaw wa da em ki kot ki sla (Notification) wa pynyoo wa yaka Mawkhar wa kiwi ki chnong da e kti yaki cha ka sorkar phareng (British Government) da u syiem ka Mylliem. Ka Supreme Court da pyrchah ko ya ini i rai hajrong ka yurim wa u syiem ka Mylliem da e kti u ya kini ki chnong yow ye ka Municipal u krehkaam ko tangwa ym em mut wa hap ki hapoh u pood u ang wa synchaar ka Shillong Municipality.
Kamtæ u Vincent da ong u wa ini pynyoo wa i bor ka Khasi Hills District Council Court leh krehkaam ko haki thaw wa kynthup yong ka Shillong Municipal Board kawa da e bor du wow ye ko u krehkaam donhi ym toh wow kam yei thaw. Hajrong ini da dawa na u Modi wow pyllait noh yaka Meghalaya naka CAB yow lait na i huri hura wa joor katni.
Discussion about this post