15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Thooh ka sorkar ya kiwa napoh jylla wa lai cha ka yalang niam ha Delhi wa mih i yoh COVID-19

0 Comments

Hadien wa yoh yutip wa em kiwa naka jylla Meghalaya kiwa lai chimbynta haka yalang niam ka Tablighi Jamaat ha Hazrat Nizamuddin Markaz, Delhi kawa pynman nadooh ka 13-15 tarik uni u bnai March, neiliang u montri rangbah ka jylla u Conrad kamjooh ki pulit da kyntu ki ya kini kiwa lai chimbynta wow phone ki ha u 108 wei wow khana bniah ya i lai i wan ki kamjooh heiwon em ki katni.

Da phah leh ya kini ki bru wow lai smat ki cha ki Hospital, CHC, PHC wa em cha jan dooh ki.

Neiliang won ka Shillong Markaz da pyntip ko wa em ki dkhot yong ka wa lai cha ka Hazrat Nizamuddin Markaz ha Delhi chwa wow pynbna yaka Lockdown. Wei katni da sahkut ki ha Delhi wei man ki leh kiwa em i kitkhlieh wei smat ki wow ya krehlang wei wow leh ya iwa emkaam.

Ka Shillong Markaz da e ko yei pyrtuid yong ki 7 ngut ki dkhot yong ka wa kynthup ya arngut kiwa na Ladrymbai, arngut na Barapathar, arngut na Polo wa uwi na Garikhana, Shillong.

Ya kani ka jooh ka kaam, ka sorkar Assam leh da chimkhia ko wei da yoh ko yei pyrtuid ki 299 ngut kiwa naka jylla Assam wei dang booddien yow chemdien cheiwon em ki.

I khuslai da mih i hadien wa em 24 ngut kiwa da yoh ya u COVID-19 kiwa em ha kani ka Mosque wa pynman ya kani ka yalang niam wei da poi 394 ngut cha Hospital.

Da suba wa ya uni u khñiang da wanrah da uwa yahkhmat niam uwa dang wan naka yalang niam ha Indonesia.

Ki baar ri kiwa da em ha kani ka yalang da poi ki 281 ngut kiwa wan na ki 21 tylli ki ri.

Previous
Next

0 Comments

Leave a Reply