Katkam wa pyntip ki pulit, ha ka 25 tarik u December 2025 heipor 9:30 i miet da em ki bru wa yahkhmat da u waheh chnong ka Wahsarang kiwa da lai cha yung u Milas Khaii yow thooh ya uwi u bru wa tip kam u Jur Tlang neidaw wa maham u ya u waheh chnong heiwa da suba ki wa u Jur da em u ha yung u Milas Khaii deilang wa u Kamelus Khaii.
Ha ini i por da mih i ya kajia hapyrdi ki ar liang heiwa ki bru wa yahkhmat u waheh chnong wa tip kam u Pius Khaii deilang wa u Tali Lamo da dat ki ya u Kamelus wa u Milas da ki dieñ heiwa da mynsoo ki wei da kit ya ki cha Hospital da kiwa ha-yung ha-sem ki wei hadien da yoh ki wow mih Hospital.
Ha ka 27 tarik u December 2025 da yoh ya ka FIR na u waheh chnong ka Wahsarang pyrchah ya u Jur Tlang deiwa ong wa maham u ya oo kam u waheh chnong. Uni u waheh chnong da ong u wa nyngkong kwah donhi u wow yaklam wa u Jur Tlang neibhah wa kwah donhi u wow tip yei daw wa maham u wei kiyi kiwa pynchit oo wow leh yeini.
Hadien kani ka FIR da yachem yaklam ya pynbait waroh ki ar liang.
Ha ka 30 tarik u December 2025 won da yoh ya ka FIR na ka Chinda Bareh heiyatoh wa iwa jia ha ka 25 tarik u December 2025 heiwa u pa ko u Milas Khaii wa u ma ko u Kamelus Khaii da chah dat ki da ka knor wa ki dieñ hadooh wa hap thiah Hospital ki.
Tangwa ha ka 31 tarik u December 2025 waroh ar liang da yachem ki wei da yasuk ki heiwa da pyndam ki leh ya ki FIR wa da e ki.
Hadien ini won ha ka 1 tarik uni u January 2026 heipor 5:15 i step da pyntip cha ki pulit wa da khlaad noh u Milas Khaii wei da phah ya ki pulit wow lai pynman ki yei takit.
Ha ka 1 tarik hi da yoh sa kawi ka FIR na u Pas Khaii wei da Register ya ka hapoh ka Section 105/3(5) BNS.
U SP ka East Jaiñtia Hills da pyntip u wa da phah lai thooh ya uni u waheh chnong tangwa da yut u wei ym pu em yoh wow kem oo.
Discussion about this post