Hadien wa poor i Video wa pynyoo yei chah lehbeiñ chah leh khlem akor da ki kaam wa ktah yei man kynthai kawi ka bru kawa da suba toh kawa na Northeast, da wanrah i yei beiñ na kiwa boon heiwa neilang ki pulit ka Assam leh da tyrwa ki da i nong wa heh lada em wa ye u tipmit ya ki 5 ngut wa emkti ha ini i kaam wa kynthup leh ya kawi ka kynthai.
Nyngkong da suba wa ini i Video toh iwa yatoh wa i pasi kawi ka kynthai Naga iwa da jia ha Jodhpur, Rajasthan ha ka 23 tarik uni u bnai tangwa neiliang u Additional Director of Police, Delhi Police wa u Special Commissioner u Robin Hibu da pyntip ki wa ka kynthai wa pasi wa kawa chah lehbeiñ ym toh ka jooh iwa da pyntikna da ka payu kawa pasi.
Chooh chooh ym tip wa ynnu riñ ya ini i Video kamjooh heiwon i thaw wa da jia i tangwa da suba wa ka kynthai kawa da chah lehbeiñ chah pynchitom toh kawa na thaaiñ mihsngi.
Neiliang u Kiren Rijiju da kyrpaad u ya ki pulit wa ki paidbah wow wan chakhmat wow e yutip ya kini kiwa emkti ha ini i kaam.
Ki bru paidbah kiwa da pyrchang wow puræ bniah yaki kyntien wa da klam kini ki bru hapoh ini i Video da ong ki wa sñiaw kam i ktien Bangali wa Sylheti.
Heiyatoh wa ini neiliang ka KSU (Delhi Unit) leh da thoh ko cha u Montri Kaam Pohyung ka ri u Amit Shah yow chimkhia u ya ini i kaam yow chem smat ya kiwa emkti wei wow pynchitom ya ki katkam ka aiñ.
