Jowai: Ka Kiang Nangbah Government College Jowai ynne ka 6 tarik da kynmoo burom ko yaka World Environment Day deiwa thung ya kamwa 107 tylli ki tre dieñ (Mahogany Tree) kawa da chimbynta da ki kynroo khyllood puræ Higher Secondary School, ki dkhot ka Student Union kani ka College, kiwa sikai wa kiwi hei emlang u Principal u S. De.
Ya kini ki deiñ da pynyoh daka SPREAD North East, Shillong kawa kreh yow pynku yei bha i miat ka rymaw kam hei rep i riang, i thung yaki dieñ ki seij khlem pynemkaam sboh dawai.
Ka Darhmingliani Hloncheu, Accountant SPREAD North East, Shillong khana ko wa lyngba kani ka seiñ, lai haroh ki cha ki skur, ki College deiwa yarap yaki khynnah puræ u sñiawthooh ki yei kordor ki jait wa thung næ warep.
Da pyntip ko wa kani ka SPREAD North East ym pu em slem poi ko ha Shillong heiwa i tre yong ka toh ha Assam. Em ko ar tylli ki Farm wow e sikai yaki khynnah skur, ki warep wa kamjooh ya kitæ ki Green Commando kiwa chah sikai bniah chaphang ka rymaw hei yatoh ki jait thung wa ka rep, wei mynda dep yaka sikai, ki u pynkrehkam won ki haki chnong ki thaw yong ki.
Heijooh i por pynsñiaw haroh ko yaki kattu katni ki kaam wa kani ka seiñ da lai luti ko ha Assam kam chaki skur nalor wada ye haroh ko u pynmih yei chna yaki sboh rymaw watip ki Vermicompose, wei da em leh ki skur wa lai e sikai ki heiwa ki khynnah leh da pna chna ki yaki sboh dep te dai.
Ya kini ki dieñ da thung kamwa 87 tre ha pchem ka College katwa 20 tre won da thung hei thaw wow pynman yaka Higher Secondary School yong ka Kiang Nangbah ha Mynthong.
Discussion about this post