June 6, 2019

Sa 4 ngut wa yoh ki pulit u pynlait, daw takit noh da ka SIT

Jowai: Ynne ka sngi heiyatoh wa i chah khayi ki khynnah wa ki kynthai ha West Jaiñtia Hills ki pulit da yoh ki wow pynlait u yarap sa kamwa 4 ngut ki kynthai wei kattu waroh da ye u pynlait hadooh 24 ngut (iwa kynthup ya 9 ngut kiwa hapoh 18 snem wa 15 ngut kiwa palat 18 snem).

Neiliang u SP ka District, u Lakador Syiem da pyntip u wa ynne ka sngi da thung noh da ka Special Investigation Team (SIT) wow takit ya ini i kaam. Ya kani ka SIT daw khlieh da u DSP (HQ) u MJ Marngar, wei daw em ar ngut ki dkhot wa kynthup ya u Circle Inspector/OC ka Jowai Police Station u BR Marak wa ka OC ka Women PS ka I. Kharpran wei ya kani ka SIT daw pait da u Addl. SP u Bijay Chettri chirup wa u DSP Moksha wa ka DSP Mukherjee.

Da ong u leh wa i daw wa da thung ya kani ka SIT toh neidaw wa kani ka kaam ye ko u yatoh wa kiwi ki District (Inter District), namo kiwi ki jylla (Inter State) wot hadooh wa kiwi ki ri (International Trafficking) khnang wow ye u pynkut noh ya ka takit.

Chooh chooh da ong u wa daw pteiñ u thooh ya ki khynnah wa ki kynthai kiwa da chah pynngat ha kani ka kaam wow e yarap ya ki.

Heijooh i por da ong u wa kiwon kiwon kiwa emkti wow pynemkaam bakla ya ki 9 ngut ki khynnah daw kem ya ki khnang wow ye u pynngat ya ki hpoh ka aiñ POCSO.