Ka Meghalaya Football Association (MFA) da thung ko da u H Standly Rozario uwa khut siñ kam u Stanley yow man kam u Head Coach kam chibynta i pynkhreh ya ka National Games 2027 kawa daw pynman ha Meghalaya.
U Rozario toh uwa da jooh kreh ha North East ha ki kaam yalehbol wei da jooh man u leh kam u Coach ka Shillong Lajong FC hawa sdang ki wow chimbynta ha ka I-League ha u snem 2009-10 kamjooh hawa chimbynta ha ka Federation Cup heiwa ka Lajong da rem Final ko.
Da jooh kreh u leh wa ka United Sikkim FC wa ka Aizawl FC ha ki snem wa bood.
Man u leh uwa em ya ka AFC Pro Licence heiwa da Coach u leh ya ka East Bengal, Mohun Bagan wa Salgaocar kamjooh ya ki Team ka Indian Army/Services. Ha u snem 2006 hadooh 2008 da man u kam u Assistant Coach ka Indian Senior Men’s Team hapoh u Head Coach, u Bob Houghton.
Neiliang ka sorkar Meghalaya da pynchlur ko ya ki Sports Association ka jylla wow pynkhreh ki deiwa miat dooh neibynta ka National Games deiwa pynbiang ki tiar ki tar, ki thaw yalehke, ki Coach wa kiwi de wei da em kyrmen leh wa kiwa yalehke ka jylla daw wanrah burom ki ha ka yalehbol.
Discussion about this post