Hajrong i sikai ka Ñiamtre wow burom u kheiñkor ya ka Bei Ramaw, neiliang ka Seiñraij Niamtre Ummulong, ynnin ka sngi da pynman ko yei thung dieñ ha Loom Thang-bru yong ka kam chibynta wow pyn-im yei yirngam ki soodong sookun.
Yeini i thungdieñ ka Seiñraij Niamtre Ummulong da jooh leh man-u-snem ha ki thaw yong raij, katwa ha uni u snem won lyngba i yarap yong ki khon ka Seiñraij da yoh laad leh u thung ya ki jait dieñ kiwa emkaam hei leh niam leh rukom, kam ki Sla Ladaw, ki Sla Lamet, ki Syiñ, ki Syiñ Chyrmit, ki Klongskoo, ki Chken Wapung wa kiwi tawon de kiwa emkaam hei leh niam.
Hajrong ini, neiliang u Sainborlang Rymbai uwa man u Secretary ka Land & Forestry yong ka Seiñraij Niamtre Ummulong, da e khublei u ya waroh ki khon ka Seiñraij kiwa da ya krehlang chirup neibynta wow pynmiat pynbha ya ka Bei Ramaw, kamjooh leh kiwa da sbun mynsien wow yarap ya ka Seiñraij khamtam hei wow yoh laad u thung ya ki dieñ ki chken kiwa emkaam hei leh niam leh rukom, khnang wow pynsuk ya ki khon ka Niamtre manda emkaam heipor leh niam.
Discussion about this post