Ka sorkar jylla lyngba ka chnat Social Welfare ha ka 15 tarik uni u bnai da pynmih ko ya kawi ka hukum katkam ka Section 3 yong ka Meghalaya State Commission for Women Act, 2005 heiwa da thung ya kiwa kitkaam wa ki dkhot wa thymme ka Meghalaya State Commission for Women (MSCW) ki wow kreh katkam ka samoi wa le snem.
Kamtæ da thung ya ka Phidalia Toi (MA) kawa na Jowai kam ka Chairperson katwa ka Samalotha Ch. Sangma kawa jooh man kam ka Director ka Soil & Water Conservation kam ka Vice Chairperson ka Commission.
Heijooh i por da thung leh ya ki dkhot ka Commission kiwa kynthup ya ka Candida Kharsyntiew (MSc), ka Felicita L. Majaw kawa jooh man kam ka Lecturer ka Nongstoin College, ka Violet Lyngdoh kawa jooh man kam ka MDC warim ka JHADC na Khliehriat wa ka Susan M Sangma kawa jooh man kam ka khlieh namo ka HOD (Garo) ha Don Bosco College, Tura katwa ka Linda J Sangma won kam ka Secretary.
Ka tulop wa kiwi ki jait su ya ka Chairperson wa Vice Chairperson wa ki dkhot u su katkam ki kyndon ka aiñ heiwa kani ka Commission u krehkaam ko katkam ki kyndon yong kani ka aiñ Meghalaya State Commission for Women Act, 2005.
