Ka seiñ KSU Ranikor Unit da ong ko wa ki paidbah ka Ranikor Civil Sub Division South West Khasi Hills District da hap ki wow maad yei chiboon i eh na i daw wa thut ka Network, i wym biang ki tiar ki tar wa i duna ki wakreh yong ka SBI Ranikor Branch.
Kamtæ ynne ka 24 tarik, lyngba ki dkhot yong ka KSU Ranikor Unit da lai pait ki ya kani ka chnat Bank yong ka SBI wei da chem wa ki paidbah da hap ki wow yieñ laiñ nadooh 7 waje i step du wow wan sai poisa neibynta wow pynbiang ya iwa emkaam yong ki ha yung ha sem yong ki hanla ya ki Bank da toh wow wai nadooh 10 waje i tep. Wei ini man ko i eh wa ki paidbah nadooh ka thaaiñ Phlangdiloin, Photkroh da maad ki boonsien wa em ki por wa ka Network ym man ko wei ini da ktah wei pynthut ko ya i krehkaam yong ki kor ATM.
Ha i thooh bniah yong ka seiñ da chem wa boonsien da em i thut haka Internet wei boonsien won ym jooh em ko. Da chem leh wa ka Token Machine hapoh kani ka Bank da dooh nadooh u Duyatra (Jan) tangwa ym em u chna hadooh katni, ka kor chon kot namo ka Printing Machine leh da sih ko nadooh chwa ka Lockdown.
I em ki wakreh hapoh kani ka Branch leh dang duna bha hawa wyrchaw wa i em ki paidbah wa chong chnong heiwa da em du u Branch Manager wa 4 ngut kiwi kiwa kreh.
Ka seiñ da ong ko wa duna ka poisa ha kani ka Bank iwa da pynbor ya ki paidbah wow liwan yung khlem poisa.
Ini i tkhoh krehkaam ka Bank da ktah i ya ki paidbh ka Ranikor Civil Sub Division ha ki phaw tylli ki chnong, nadooh na Phlangdiloin, Phlangmawprah wa kiwi kiwi neibhah jooh wan sai poisa ki heini kam ha ki kreh NREGA ha ki chnong yong ki wei haap lai ki 3/4 kynta wow lai sai poisa.
Ka seiñ da joh yachem ko ya u Chairman ka Meghalaya Cooperative Apex Bank wow booh Branch thymme noh ha kani ka thaw neibhah dang duna bha ki Bank ha kani ka thaw. Da kyntu leh ya u Syiem ka Hima Maharam wow pyrkhat wow khang ya ki company booh Mobile Tower hapoh ka thaaiñ neibhah wym biang Network da ktah i ya ki paidbah.
Kani toh katkam ka wyrta na u Forwardman Nongrem, President KSU South West Khasi Hills District.
