U President ka Hill State People’s Democratic Party (HSPDP), u KP Pangniang da ong u wa toh ki Map wa ki pynbna kiwa khlem pynyoo wa ki 12 tylli ki thaw wa ya kajia pood haap ki hapoh ka jylla Meghalaya katwa em won ki Map wa pynyoo wa haap ki hapoh ka jylla, kamtæ toh u em ya Map kawa biang.
Da ong u wa ha Meghalaya da pynemkaam ko hadooh 3 tylli ki Map, najrong ka Map wa da pynmih da ka GSI, kawi ka Map toh kawa pynemkaam ha Secretariat, katwa ka Map kawa le da pynmih da ka chnat Revenue and Disaster Management yong ka jylla.
Da ong u wa katkam ka Map wa da pynmih ha u snem 2009, wot ka Map wa pynemkaam da ka chnat Election, ym em kitæ ki 12 tylli ki thaw wa ya kajia pood wa ka Assam, wei man iwa emkaam wow dro biang ya ka Map wa thymme.
U Pangniang da ong u leh wa ka HSPDP nadooh wa da yoh ya ka jylla ha u snem 1972, da pyrchah ko yei rai wow e jylla ya ka Meghalaya khlem u pood u ang.
Uwa yahkhmat ka HSPDP da pyntip u leh wa ha i por wa man u kam u MLA da rah u ya kani ka phang hapoh ka yung dorbar chna aiñ ka jylla ha u snem 2017, ha i por wa u Prof. RC Laloo man u kam u Montri wa pait ya ka chnat Revenue & Disaster.
Heiyatoh wa ki Video wa pynyoo wa yaam kiwa chong chnong khappood ka Rambrai-Jyrngam wa daw em noh ki cha Assam hadien wa soi ya ka soskular MoU, da ong u wa ka Regional Committee da yaleh ko wow ap yeiwa da kyrpaad ki paidbah.
Da ong u leh wa dadep wow e laad ya ki paidbah wow pynsñiaw yeiwa kwah ki wei da pdiang leh yeiwa da ong ki wei kattu chong hei rai yong ki Montri Rangbah ka Assam wa Meghalaya.
Puræ leh: Ki 12 tylli ki thaw wa yakajia ym haap ki hapoh ka jylla Meghalaya: KP Pangniang
