U Montri ka chnat District Council Affairs (DCA), u Lahkmen Rymbui da ong u wa waroh ki District Council ha ka jylla toh u bood ki ya ka nongmuna ka Jaiñtia Hills Autonomous District Council (JHADC) kawa da rai wow pyndooh hadooh 300 tylli ki kreh (Post) ha ka Council yow lait na i lutsan.
Da ong u wa lada waroh ki ADC bood ki ya kani ka nongmuna daw wanrah i yei kylla hei rukom pynlai ya ka Council, heiwa daw ye u pyndap u su ya ka tulop ki wakreh yong waroh ki Council khamtam ha GHADC.
U Lahkmen da ong u wa ha JHADC em kamwa 2,000 ngut ki wakreh wei i chim ya i rai wow pyndooh ya ki Post kiwa palat 300 tylli daw yarap bha i ya ka Council, heiwa da ong u wa i pyndooh kreh ymtoh u man i iwa syndet tangwa ya ki bru wa daw chong-ngiah da rai wow dam chwa wow thung kreh heithaw yong ki kamwa da pynbait wei wow pyndooh leh ya kiwa ym em yumut.
Hajrong i dawa ki wakreh ka GHADC wow pynlait ya ka bhah yong ka Council wa T. 55 klur, neiliang u montri da ong u wa ympu yoh yutip hadooh katwon ka bhah yong ka wa dang sah wei da em leh iwa da dep su wa da dep e cha ka GHADC.
Chooh chooh hajrong i maham wa ym thap Vote ki wakreh ka Council ha ka Election MDC cha ka GHADC, neiliang u Lahkmen da ong u wa ka chnat da ekti ko yeini cha ki bor wa toh u pait yeini khnang wa i kaam u man i iwa lai bait khlem iwon iwon i thut.
