Ka FKJGP-West Jaiñtia Circle da ong ko wa i por toh iwa da biang wow kyntu chooh chooh ya ka rep ka riang hapoh Amlarem Sub-Division yow ye u pynmih rap boon ya ki jhoor, ki soh ki pe wa ki mar ki matta.
Ka seiñ lyngba ka Socio Economic Movement kawa man kawi na ki chnat krehkaam ka seiñ, da thrang ko chiboon khamtam cha kani ka thaaiñ kawa pynmih chiboon ki soh khamtam u soh khontara wa kiwi kiwi.
Ka seiñ da ong ko wa ha kam kini ki por Lockdown, teiñ teiñ man ko iwa jynjar bha wow yoh ki jhoor wei lada yoh leh, i dor toh iwa syad iwa man iwa eh ya kiwa dooh wa duk wow thied ha kam kini ki por wa chem chitom, tangwa lada ka sorkar kyruiñ ko cha kini ki kaam rep wow thooh kammon wow yarap ya i eh kiwa ki paaid warep yachem ki, daw man ko i kyrkhu wa i e mynsien ya kiwi wow pynkhlan chooh chooh ya ka rep ha iwi pa iwi i manyung.
Chooh chooh ka seiñ da ong ko wa hawa pait cha kiwa leh Welding, ki Furniture, ki kaam chet baam wa kiwi kiwi, em ki boon tylli tangwa teiñ teiñ wiar hi-eh ki neidaw wa ka sorkar ym em kynmoo ko wow yarap wow rah chooh chooh cha jrong ya ki khnang yow lait ki wow oor chiteiñ por.
Ka seiñ ka dawa ko leh na ka sorkar wow chna laad noh wow wanrah ya ka Lay-By Market kawa biang ha Amlarem ka thaw wa man pyrdi ka Sub-Division, wow yarap ya ki warep wa kiwi de yow wanrah ya ki jhoor ki jhep wa ki mar ki matta kiwa da pynmih neibhah man ko iwa jynjar wow dai cha madan madiah kawa ki hap ki wow chah ha u slap u phria wei daw sih lut ki mar ki matta wa ki jhoor ki jhep lada ym biang i thaw ya ki wow dai.
Ka seiñ lyngba ka Socio Economic Movement daw wanrah ko da ki thong krehkaam wa kyrpang neibynta wow thooh ki laad ki luti wa kammon u leh wow yarap wei wow chem yeiwa eh wa ktah ya ki warep wa kiwa seiñ khih da i yong ki hi yow ye u leh yeiwa emkaam chooh chooh ya ka kaam rep kaam riang wa ka khayi ka pateiñ hapoh ka thaaiñ.
Ini toh katkam ka kyrwoh na u Shlur Mukhim, President ka seiñ wa u Reachinson Kongwang, General Secretary ka seiñ.