Ha ka National Conference wa le sngi yong ki Montri ki jylla wa pait ya ki kaam uiñke suwari wa da pynman wei da pynkut ha Dharamshala, Himachal Pradesh ynnin ka sngi, da emlang u Union Tourism Minister, u Kishan Reddy. Ki Montri ki jylla wa da ya emlang kynthup ki na ka jylla Madhya Pradesh, Arunachal Pradesh, Assam, Goa, Haryana, Mizoram, Odisha, Tamil Nadu, Uttar Pradesh, Punjab, Maharashtra wa Himachal Pradesh.
U Reddy hawa e yei klam da kyntu u ya ki jylla wow jied wei wow leh da iwa bha tam yow pynku ya ka ki kaam uiñke suwari deiwa ya krehlang wa waroh kiwa emkti lang kamjooh yow chna ya ki Yuva Tourism Clubs neibhah kini ki Club ye ki wow pynkylla dur ya kani ka chnat.
U Reddy da khana u leh wa ya ka lama ka ri daw booh ha waroh ki thaw uiñke suwari deiwa kyntu leh ya waroh ki jylla kamjooh kiwa em Hotel kiwa pynlai ya ki thaw uiñke suwari wow booh ki ya ki lama ka ri.
Hawa khana ya iwa da mih na kani ka Conference, u Secretary ka Tourism, u Arvind Singh da ong u wa ka India daw man ko kam ka kor wa ngiat ya ki kaam uiñke suwari hapoh pyrthai kamjooh hapoh ka ri. Da khana u leh wa waroh ki thaw uiñke suwari da pynyoo ki ya ki dak ki chin wa da im biang ki kamwa da man chwa wa wan ka khlam heiwa hadooh ki lieñsuiñ leh man ki kiwa dap kamjooh ki Hotel.
Da klam u leh chaphang ka National Tourism Policy heiwa da booh thong wow yoh USD 1 Trillion kat ha u snem 2047 wei ka sorkar leh daw pteiñ ko wow wanrah ya ki Scheme yow pyntikna da khai im lut kiwa da chah ktah ha ka khlam.
Da booh thong leh wa ha u 2024 ki kaam uiñke suwari u man ki kam nachwa kat hawa poi chiteiñ u snem. Da antaad leh wa ka sorkar daw yoh ko 50 Bn USD GDP na kiwa uiñke suwari wa 30 Bn USD nei kylliang poisa namo ka Foreign Exchange wei da antaad wa daw poi 15 Million ngut kiwa na baar ri kat ha u 2024 deiwa yoh kreh 137 Million ngut ki bru hadooh u 2047.
