Ka Aspire Meghalaya da sdang pynman ko ya ka District Talent Events 2022 nadooh ka 6 tarik uni u bnai ha waroh ki District ka jylla wei daw pteiñ hadooh u bnai wow wan heiwa ynne ka sngi da sdang ha East Khasi Hills ha U Soso Tham Auditorium, Shillong deiwa em 26 ngut kiwa pynyoo yei sap (Talent) na ki 5 tylli ki thaw puræ wa yakhun wow yoh yei naam Top 3.
Ynne ka sngi da pynkup burom leh ya ki 103 tylli ki skur na ki District da u Montri Rangbah ka jylla, u Conrad K Sangma kiwa da chimbynta ha ka Meghalaya Youth Survey 2022 waka Soft Skills Training lyngba ka Aspire Meghalaya.
Ka Afshana Nongkynrih (Dancing), Class 9, St. Mary’s Higher Secondary School, Shillong; Elanstar Mawiong (Musical Instruments), Class 11, St. Anthony’s Higher Secondary School, Pynursla; wa u Ashish Paul (Singing), 1st Semester, Shillong Commerce College, Shillong da man ki kam ki Aspire Meghalaya District Stars na East Khasi Hills.
U Conrad K Sangma, hawa e yei klam da ong u wa u Montri ka chnat puræ puthi ka sorkar India ha ki bnai wa dadep da wan u cha ka jylla heiwa da phah pynkhreh u yei batai bniah (Presentation) hajrong ka Aspire ya iwa daw e batai ha ka yalang All Education Ministers’ Conference ha jylla Gujarat khnang wow man ko ka nongmuna ya kiwi tawon ki jylla ka ri.
Chooh chooh da ong u wa lada kwah i wow wanrah yei kylla ha ka jylla wei wow man kam ka Top 10 State ha ki 10 snem emkaam wow sdang na kiwa embynta (Stakeholders) wa ki seiñ nadooh ki warep, ki kynthai wa manbei wa ki khynroo khyllood.
Da ong u wa ka Aspire mang ko wow thooh ya ki sap wa rieh ha ki bru samen wei waroh emkaam u tip ki ya i sap wa em ha ki. Chooh chooh da ong u wa ymye wow yoo ya i myntoi na kani ka Programme pyn myntu tangwa kini ki khynroo khyllood kiwa em katni daw pynyoo ki yei kylla wa bha wa jop kat dang lai i por deiwa kyntu leh ya i yakrehlang waroh.
Heijooh i por da ong u wa ha kani ka juk wa katni wa joor i yakhun (Competition) emkaam wow man ka yakhun neibynta i bha wei i beiñ leh toh u mih i neibynta iwa bha ymtoh neibynta wow pynsih.
U Conrad da ong u leh wa ka Reservation Policy em ko neibynta yong i wei ini ym mut wa i rukom pyrkhat u kut i wa du neidaw wa em ka Reservation Policy tæ ym em de i mynsien wow yakhun wa kiwi, emkaam wow yakhun lakam wym em katæ ka Reservation Policy.
Ka Rosetta M Kurbah, Director, School Education & Literacy hawa e yei klam da ong ko wa katni da sakhi yei wan ka la’ær wa em mynsien ki khynroo khyllood khamtam hadien wa chah hikai ki kam ha ki Workshops ka Soft Skills, wow chem ya i sap, wow pynchiap ya i mynsien wa chlur, i rukom pyrkhat wei ya ini i e sikai da pynman ha ki 62 tylli ki skur ka jylla. Da kyrmen skem ko leh wa lyngba ka State Summit daw em ki 12 District Aspire Stars wa 24 ngut kiwa wan wa-ar.
Ka bynta wa khroo yong ka Aspire Meghalaya toh wow chem ya kiwa em sap ha kylleiñ ka jylla heiwa da em 350 ngut kiwa em sap la hei chaad, i rwai, i kynmoo kyntien, kiwa em sap wa pynyoorong (kam i dro dur, tah dur wa kiwi kiwi). Ki Top 3 namo ki le ngut kiwa haphrang dooh daw jied ya ki da ki dkhot ka District Talent Committee ha ki jar jiar ki District heiwa ki 36 ngut ki District Stars daw yakhun ki neibynta ka Top 12 State Stars.
Hadooh ynne ka sngi da tipmit ya ki 24 ngut kiwa em sap na ki 8 District wa kynthup ya ka Eastern West Khasi Hills, North Garo Hills, West Khasi Hills, West Jaiñtia Hills, South West Garo Hills, East Garo Hills, South Garo Hills wa East Khasi Hills.
Da em leh 178 ngut kiwa pynyoo ya ki sap ha ki 41 tylli ki skur na ki 8 District heiwa da pynkup burom leh ya ki le ngut kiwa poi chaphrang na kawi pa kawi ka District.
Ha uni u snem hapoh ka Aspire Meghalaya da e sikai ya palat 64,000 ngut ki khynnah ha ki 332 tylli ki skur deiwa kyrchaan ka chnat Sports & Youth Affairs ka sorkar jylla deilang waka State Education Mission Authority of Meghalaya (SEMAM-SSA) hapoh ka chnat Education.
