U heh ka Bharatiya Janata Party (BJP) ha ka jylla, u Alexander Laloo Hek da pyntikna u wa u Bernard N Marak u man bait u kam u kyrtong wow yakhun ya ka Election MLA 2023, khamtam wa man u leh u MDC ka GHADC na North Tura.
Da ong u wa ha ka 10 tarik uni u bnai da lai u cha Tura wow pynman yalang wa kiwa kyrchaan ka BJP ha North Tura wa South Tura Constituency, da ong u wa kitai ki ar Constituency toh kiwa kyrmen bha wow jop ka Party.
Hawa kylli, u National Executive Member ka BJP da ong u wa u Bernard u yakhun bait u ya ka Election MLA, tangwa chong won ha ka Party wow phah yakhun na North Tura namo na South Tura.
Ha iwi i liang u Hek da ong u wa da yachem leh ya kiwa hayung u Bernard, wei da pynsñiaw u wa ka Party daw emlang bait ko wa ka yung ka sem yong u MDC uwa em katni ha patok hadien wa chah pynbaad wa pynlai u ya ki kaam pyrchah aiñ ha Rimpu Bagan.
Kam wow kdaw heini ha ka 22 tarik u Naiynñiaw ki pulit ka West Garo Hills da lai kynreh ki ya ka Rimpu Bagan iwa man i Farmhouse yong u Vice President ka BJP, u Bernard Marak hajrong i pynbaad wa pynlai u ya ka ki kaam dakait ha ini i thaw, wei ki pulit da kem ki leh ya uni u heh ka BJP uwa man leh u MDC ha ka 27 tarik u Naiynñiaw na Uttar Pradesh.
