Ki seiñbhalang wa na Ri-loom Garo wa kynthup ya ka GSU, FAF, ADE, AYWO wa FKJGP da kyntu ki ya sorkar Meghalaya wow pynjoor yei pynbor ya ka sorkar India wow pynkrehkaam ya ka ILP waka MRSSA yow yoh yada ki tre ri ka Meghalaya yow ye noh u pynkut yei kylla dur ka imlang sahlang nei wan kiwa psiah pyrchah ya ka aiñ.
Ki seiñbhalang da kdaw ki wa ka sorkar Manipur da mynjur ko ya ka ILP hadooh le sien hapoh ka dorbar chna aiñ hadooh wa da yoh ki yeiwa dawa ki wow pynkrehkaam ILP. Ka sorkar Meghlaya leh toh u pynyoo ko yei jooh i chimkhia wow pynkrehkaam ILP hapoh ka jylla.
Kamtæ da ong wa ka yaleh ILP toh kawa da slem bha heiwa ha u snem 2013 ki seiñbhalang da yoh bha ki yei chkoor ka sorkar heiwa da wanrah ko da ka MRSSA tangwa ya kani da yoh sñiaw da ka sorkar pyrdi neidaw wa em ka Look East Policy. Da ban joor leh wa ki 13 tylli ki seiñbhalang ym jooh em randien ki wow dawa ya ka ILP wei da sahkut i pynkhreh neidaw wa em ka khlam. Kamtæ da kyntu ya ka sorkar Meghalaya waka liang pyrchah wow pdiang biang yei pynkrehkaam ya ka ILP hapoh ka dorbar yow pynbor ya ka sorkar India.
Heiyatoh waka MRSSA kawa da mynjur man aiñ ha u snem 2016 wei kawa dang yang wow pynkrehkaam hadooh katni heiwa dang pynkrehkaam du da ki Facilitation Centre, da yoo lakam i buit pynslem donhi da ki sorkar iwa kattu da poi 9 snem wow pynkrehkaam noh ya ki kyndon yong ka MRSSA. Kamtæ da kylli wa lada ini waroh toh du wow pynbiej donhi.
Da kdaw leh yei wym ye ka sorkar wow leh iyi iyi ya kiwa wan chong chnong pyrchah ya ka aiñ ha Wadagokgre, West Garo Hills heiwa da em ki bru kiwa psiah tooh chapoh ka jylla wei da chong chnong ki ha i thaw wa em ki thaw wa da chna u warim wajah. Heiwa da dep yang da slem ya ka sorkar wow leh ko iyi iyi neidaw wa em ka khlam tangwa i por da biang wow leh yeiwa emkaam neibhah ki paidbah leh kyrchaan ki ya ini i yakhih wei lada pynslem wow leh ya ini, daw sdang biang yei yakhih.
