U National President ka seiñ National People’s Party (NPP) uwa man leh u Montri Rangbah ka jylla, u Conrad K Sangma ynne ka sngi da poi u cha Imphal neibynta ar sngi wow phyllu yumut ya ki kaam wa yatoh wa i jied ya kiwa mihkhmat cha ka yung dorbar chna aiñ ka ylla, namo ka MLA Election ka wow man ha u snem 2022.
Katkam ka yutip wa tikna wa da yoh da ong wa u Conrad daw yachem u leh wa ki heh ka NPP na Manipur wow pyrkhat ya ki kaam wa da leh ko hapoh ka jylla kam chibynta yong kani ka Election.
U Conrad hadien wa kut ka yalang ynne ka sngi da ong u wa ka Party daw yakhun ko ha kiwa boon tylli ki Constituency wei ymbien ko wow yakdoh-lok (Pre-Poll Alliance) wa kawon kawon ka Party.
Kam wow kdaw heini ka Manipur em ko 60 tylli ki Constituency heiwa ha ka Election wa khaddooh ha u 2017, ka BJP da chna ko ya ka sorkar heiwa da yakrehlang ko wa ka NPP, ka Naga People’s Front wa ka Lok Janshakti Party hapoh i yahkhmat u Biren Singh kam u montri rangbah yong ka.