U General Secretary ka United Democratic Party (UDP), u Dr. Jemino Mawthoh da ong u wa ka sorkar toh u pynsmat ko heiyatoh wa ki kynhun takit kiwa da thung, nadooh ki kynrum kynram hawa yatoh wa ka chnat Bordiñ, i chah pynbaad baamtooh ya u khoo yong ka chnat Social Welfare wa da yoh kem ha Boko, Assam wei hajrong i chah siat yap uwa yahkhmat warim ka HNLC, u Cherish Starfield Thangkhiew.
Da ong u wa neiliang ka Party ka sñiawkhia bha ko, heiwa da yaklam leh hapoh ka Party wow kyntu ya ka sorkar wa toh u pynsmat ko u pyndep ya ki takit kiwa da phah leh ha ki kynhun kiwa da thung wow sa madan yeiwa sakhiat hajrong waroh i chah pynbaad.
Da ong u wa hawa da thung ya ka kynhun wow takit, ki paidbah leh em hok ki wow tip yei sakhiat, deiwa pynrap wa ka sorkar toh u phah ko ya ki Inquiry Committee wa ym toh wow pynslem ki neibhah ki paidbah kwah ki wow tip yeiwa sakhiat.
U Jemino da ong u leh wa kitu kiwa emkti lane kiwa da chem toh kiwa da leh bakla, ka aiñ toh u bichaar ko, wei kam ki paidbah kiwa embynta ha kiwa boon ki yakhih wow tip yeiwa sakhiat, neiliang ka sorkar toh u pynsmat ko ya waroh ki takit yow yoh yei che.
Hawa kylli, uwa yahkhmat ka UDP da ong u wa ym da tip bha yei daw wa pynman ya ka takit wow slem ki, kopsar ye u man wa ym ye u pynbiang heini heitai, wei da ban biang u wa ki kynhun takit toh u rap pynsmat ki khnang wa ki paidbah ym sah ki ha ka umdoom wei kamjooh wow sñiawthooh heiwon em ki bakla wa duna khnang yow ye u pynbait noh.
