Tooid ki paidbah cha ka Lympung ka Sengkhihlang ha Seiñraij Muthlong

Ka Lympung wa 36 ka Sengkhihlang da man ko ha Seiñraij Muthlong nadooh ka 17 tarik uni u bnai, wei ynne ka sngi 19 tarik won kawa man ka sngi wa kongsan yong kani ka Lympung, da sakhi yei tooid ki paaid wa ngait Ñiamtre Ñiam Khasi na kylleiñ ka Bri u Ynñiawtrep Ynñiawskum yow ap u sñiaw yei sneiñ ki kroo na ki waheh wasian, kamjooh leh u sakhi yei chaad i rwai tynre na ki khon Sengkhasi wa Seiñraij.

Ha kani ka Lympung da wan wow sakhilang leh da ki heh sorkar wa kynthup ya u Sniawbhalang Dhar, Symbood Montri Rangbah deilang ki Montri sorkar, u Wailadmiki Shylla, u Sanbor Shullai chirup wa u Comingone Ymbon, MLA ka thaaiñ, u MLA ka Mawphlang, u Matthew Beyondstar Kurbah, neitæ ki MDC ka JHADC wa kynthup yA u Dy. CEM, u Lasky Rymbai, u Rikut Pareiñ wa u Soki Lapasam najrong ki Dolloi kiwa yahkhmat ki Seiñraij Sengkhasi wa kiwi.

U Dr. Sunil Mohanty, kam u bru Tribal napoh Odisha hawa e i klam ha kani ka Lympung da kdaw haroh u yei kyntien Tipbru Tipblai, Tip Kur Tip Kha wei Kamai Yei Hok, deiwa ong kini ki kyntien wanrah ki yei man yatylli wei u kynmoo leh yei sneIñ i yahluti ki manchwa longchwa wei wow maya kylliang para bru.

Neitæ ong u yow tipmit yow Blai nyngkong toh u em i maya i sñiaw para bru.

Neiliang u Teibor Roy Khonglam, dkhot Sengbah Ki Nongshad Nongkheiñ hawa klam hajrong ka phang yong kani ka Lympung iwa ong “Ki thied ki phniang jingshai ba im, ki suh shapoh ki sngi barim” ong u i maya ñiam yong i lailang i chirup chirup waka dustur riti, neibhah wa haki Ñiamtre Ñiam Khasi ya iwon iwon i kaam la khian næ heh da pynchong Blai ya ki deiwa pyndep i lehniam leh rukom.

Deiwa kdaw u wa heiyatoh i rep ka riang ym jooh dam ki wow e ngooh ya ka bei rymaw khnang yow biang lut i emkaam ki jait wa thung lada toh u slap ka sngi ka la’ær.

Hawa kdaw yei ngait Ñiamtre Ñiam Khasi ong u, kitæ kiwa booh yei ngait Blai ha u nood wa hei thij pyrkhat yong ki, kitæ toh kiwa man sakhiat ki bru niam, katwa kitu ki wym booh won yei ngait hei thij pyrkhat, i man Ñiamtre Ñiam Khasi yong ki da man i bakla neibhah wa i ngait yong ki da ryngkat wa kitu ki wym em ngait.

“Da seiñ ya kani ka ñiam yow neh u roi ko pateiñ la pateiñ, ymphær lada toh na kawon kawon ka thaaiñ leh neibhah ka ñiam ha ki jaitbru yong i toh kawa pynyajan hapyrdi u bru wa u Blai,” da ong u Teibor Roy Khonglam.