Shillong: Ki warep man ki kiwa napyrdi kiwa da chah ktah bha ha ka khlam COVID-19 ha ka jylla Meghalaya, wei hajrong ini, ki warep hapoh i yahkhmat u montri wa pait yaka kaam rep, u Banteidor Lyngdoh da lum u yaka yalang wa ki heh ka National Bank for Agriculture and Rural Development (NABARD).
Hawa klam cha ki laad pathai khubor, u Banteidor da ong u wa ki warep da maad ki chiboon i eh hadien wa da chah tyllep ha ka khlam ha kini ki bnai wa da dep iwa da pynman ya ki wow chem chitom ki leh wow su yaka ram ha i por wa biang.
Da pyntip u wa hadien wa yaklam, neiliang ki heh ka National Bank for Agriculture and Rural Development da mynjur ki wow pynstiñ yei su ram deiwa dam u chim ya ka Interest neibynta u bnai Wisu hadooh u Naisaphra (March-August), chooh chooh da pyntip u wa i pynyinsur man ko leh yow ye ki warep wow su suki suki ya ka ram.
Da ong u wa i yaklam man ko kawa mihsoh wei daw yarap ko chiboon ya ki warep hapoh ka jylla khamtam hadien wa da chah ktah ki na i wan yong ka khlam COVID-19.
Hawa yoh wow yaklam wa kawi na ki warep kawa dai leh ya ki mar-rep ha Butcher Road, Shillong ka B. Nongbri, da pynsñiaw ko yei sñiawkmen wa ka sorkar lyngba ka chnat ka rep ka riang da pynsñiaw ko yei eh i khoo ki warep cha ki bor pynlai yong ka Bank. Da pyntip ko wa ha kini ki bnai wa da dep kam ki warep da chem chitom ki wow pynlai yaw ya ki mar-rep, wei em leh ki sngi wa ya ki mar wa da rep ki, hap wow noh neidaw wa pyut ki.
