Tylli ki 59 MLA ya ka rai wa thymme wow tipmit noh ya ka Khasi wa Garo ha ka riti synchaar ka ri

Shillong: Ka dorbar kyrpang yong ka Meghalaya Legislative Assembly ynne ka sngi da mynjur ko ya ka rai namo ka Resolution neibynta wow phah cha ka sorkar India wow tipmit noh ya ka ktien Khasi wa Garo ha ka Khyrnit wa phra (8^th Schedule) ka riti synchaar ka ri.

Kam wow pynkynmoo wa ka dorbar kawa da man ha ka 27 tarik Naisaphra (Aug) uni u snem da chim chwa ya kani ka rai (Resolution) tangwa hadien wa da pait bniah biang ya ini da chem wa em i duna iwa ye u pynman wow chah kyntait lada phah cha ka sorkar pyrdi.

Hawa yaklam ha ka dorbar wa wanrah ya ka Resolution wa thymme, u Montri Rangbah, u Conrad K Sangma da ong u wa kani toh ka dawa wa da slem bha wow tipmit noh ya ki ktien na ka jylla. Da ong u wa hanlada ka dorbar da mynjur ko ya kani ka Resolution wa ar bnai nachwa, tangwa hadien wa da chem ki duna, neiliang ka sorkar da rai ko wow wanrah noh da ka Resolution wa thymme wei kawa khlan yow pyntikna wow yoh u psiah kini ki ktien ha ka 8^th Schedule, da iwa chong pyrkhat lang wa ki dkhot ka Khasi Authors Society (KAS) kamjooh wa ka A’chik Literature Society (ALS).

U Conrad da ong u wa i wanrah lang ha ka jooh ka Resolution neibynta ka ktien Khasi wa Garo man ko wow pynyoo ya ka tylli wa kini ki ktien toh kiwa da biang lut ki kyndon wow tipmit noh ya ki da ka sorkar pyrdi neibhah waroh man ki kiwa emkaam.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Chooh chooh da ong u wa ka sorkar u booddien ko ya kani ka kaam wa ka sorkar India hadooh wa da yoh ya i tipmit.

Ya kani ka Resolution wa thymme wa da wanrah ha ka dorbar wei da mynjur lang da waroh 59 ngut ki MLA khlem kawon kawon i pyrchah.

Hawa pynyoo ya i kyrchaan ya ka Resolution, neiliang ka MLA ka Congress na East Shillong, ka M Ampareen Lyngdoh da ong ko wa ka ktien toh iwa pynyoo yei khlan yong ka jaitbru wei toh u ya tylli wei kani ka Resolution daw wanrah ko ya i che neibynta ka Meghalaya wa thymme.

Hawa chim bynta lang ha ka yatai, u MLA ka Mawphlang, u S K Sunn da e yumut u wow tipmit noh ya ka Khasi Authors Society (KAS) wa ka A’chik Literature Society (ALS) da ka sorkar jylla khnang wa ki wow booddien ya ka kaam hadooh wa mankaam ko.

Neiliang uwa yahkhmat ka liang pyrchah, u Dr. Mukul Sangma hawa pynsniaw u yei kyrchaan ya kani ka rai da ong u wa ka sorkar toh u chimkhia ko neibynta kani ka kaam neibhah da man ko i angnood yong ki paidbah wei kam kiwa mihkhmat toh u man kiwa ya tylli ya kani ka rai.

Da ong u wa ka sorkar toh u e laad yarap ya ka KAS wa ka ALS, wei da kyntu u leh wa ka sorkar u booh ko da ki sahep kiwa stat wa kiwa kreh chitom khnang wa kani ka kam ym sepai ko.

Neiliang u MLA ka North Shillong, u Adelbert Nongrum da ong u wa ini i tipmit noh ya kini ki ktien toh kawa jhan deiwa pynrap wa ka ktien man ko ka stieh wa yada ya ka jaitbru.