Ki MLA na Ri-loom Jaiñtia kiwa em 7 ngut (East wa West Jaiñtia) da yieñ skem ki wow pyrchah ya i thmu ka sorkar lyngba ka MeECL wow ekti pynlai ya ka Jaiñtia Distribution Circle cha ka Private Company, wei kamjooh leh ya i thmu wow ekti u pynlai ya ka Myntdu Leshka Project da kiwi heiwa ya kani ka Project waroh chi kattu da pynlai da ka MeECL.
Hawa yaklam hadien ka yalang wa jhan ki 7 ngut ki MLA, u Lahkmen Rymbui uwa man u MLA ka UDP na Amlarem da ong u wa ki MLA kwah ki wa ka MeECL u pynbait ko ya i rukom krehkaam yong ka, tangwa ymtoh wow ekti wow pynlai ya ki kaam da ki Company kiwa na baar lada ki Private Company næ yong ka sorkar pyrdi.
Da ong u wa neiliang ki MLA daw thoh ki cha u montri rangbah ka jylla wow pynsñiaw ya ini i pyrchah hajrong ini i thmu ka sorkar.
